PGR husu Komisáriu CAC aposta formasaun ba investigadór
DILI, 20 agostu 2024 (TATOLI) – Prokuradór Jerál Repúblika (PGR), Alfonso Lopez, husu ba Komisáriu Anti-Korrupasaun (CAC, sigla portugés) atu aposta ba formasaun investigadór sira iha CAC ho objetivu atu investigasaun ba kazu korrupasaun bele la’o ho di’ak.
“Ita hatene Komisaun Anti-Korrupasaun kuaze tinan ida laiha lideransa no foin daudaun mak iha fali Komisáriu foun mak señor Rui Pereira. Ami hasoru malu ona no nia no hateten ona katak tempu badak nia laran sei hili Adjuntu Komisáriu sira atu kompleta estrutura Komisaun Anti-Korrupasaun nian”, Alfonso hateten ba jornalista sira iha Kuatel Jerál F-FDTL, Fatuhada, tersa, ohin.
Alfonso dehan, Ministériu Públiku husu ba CAC atu aposta ba formasaun liuliu ba investigadór sira atu sai kualidade no sai espesialista ba sira-nia área.
“Ami husu ba iha Komisáriu CAC atu aposta ba formasaun ba ita-nia investigadór sira iha CAC atu nune’e formaliza ita-nia investigadór sira sai kualidade no espesialista iha idakidak nia área”, nia adianta.
Nia enfaze, CAC presiza hametin kooperasaun sira ho nasaun sira CPLP, atu fó formasaun ne’ebé di’ak ba investigadór CAC atu ba futuru sira bele halo servisu ho di’ak liután.
“CAC presiza halo kooperesaun ho nasaun CPLP sira liuliu Portugal hanesan polísia judisiária Portugal para nune’e bele fó formasaun ba investigadór CAC atu formaliza sira hodi koñese didi’ak ita-nia lei no ita-nia Kódigu Penál”, nia konklui.
Jornalista: Natalino Costa
Editór : Zezito Silva
