CAC propoin millaun $1.6 iha OJE 2025

DILI, 21 agostu 2024 (TATOLI) – Komisáriu Komisaun Anti-Korrupasaun (CAC, sigla portugés), Rui Pereira dos Santos, hateten CAC propoin millaun $1.6 iha Orsamentu Jerál Estadu (OJE) 2025 hodi finansia ba atividade CAC nian iha tinan oin.
“Ami-nia orsamentu ba tinan 2025, husi dotasaun ne’ebé mak Governu fó ne’e iha millaun $1.6. Maibé osan ne’e ami sente la to’o, tanba ne’e mak aban liuhusi Komisaun Revizaun Orsamentu ne’e ami sei hatama proposta hodi husu osan adisionál $500.000-resin, atu kobre netik atividade CAC nia iha tinan oin”, Rui Pereira hateten ba jornalista sira iha nia kna’ar fatin Farol, kuarta, ohin.
Nia dehan, CAC husu tán orsamentu adisionál tanba tinan oin sei kontrata konsultór rua, konsultór ida sei trata kona-ba anti-korrupsaun nian, ida seluk ne’e atu mai ajuda CAC hodi halo revizaun ba planu estratéjiku CAC nian.
“Ita mós sei iha atividade seluk ne’ebé CAC sei fó prioridade mak kona-ba Estratejia Anti-Korrupsaun (ENAK) no kontinua hala’o programa ida ho naran Konvensaun Nasaun Unidas kontra Korrupasaun ka United Nations Convention Against Coruption (UNCAC) ne’ebé Timor-Leste nudar Estadu parte iha organizasaun ida-ne’e hodi kontinua partisipa iha atividade sira UNCAC”, nia adianta.
Nia dehan, orsamentu CAC ba tinan 2025 sei aprezenta iha Komite Revizaun Orsamentu iha aban dader, 22 agostu 2024 .
“CAC nia orsamentu sei halo aprezentasaun iha Komite Revizaun Orsamentu iha aban”, nia konklui.
Jornalista: Natalino Costa
Editór : Zezito Silva

