Komisáriu CAC sei nomeia adjuntu na’in-tolu hodi kompleta estrutura CAC

DILI, 21 agostu 2024 (TATOLI) – Komisáriu Komisaun Anti-Korrupasaun (CAC, sigla portugés), Rui Pereira dos Santos, hateten Komisáriu CAC sei nomeia adjuntu na’in-tolu hodi kompleta estrutura.
Adjuntu Komisáriu Komisaun Anti-Korrupasaun na’in-tolu ne’e sei toma responsablidade ba asuntu investigasaun, prevensaun, sensibilizasaun no boa governanasaun.
“Adjuntu sira ne’e naran iha ne’e ona. Agora ita tenke tais tiha. Adjuntu sira ne’e mai ne’e pelu menus bele servisu hamutuk ho Komisáriu ho Diretór Nasional sira iha ne’e ka lae no funsionáriu sira ka lae. Tanba ne’e mak ita tenke tais didiak adjuntu tolu ne’e”, Rui Pereira hateten ba jornalista sira iha nia kna’ar fatin Farol, kuarta, ohin.
Komisáriu CAC lakohi sita adjuntu na’in-tolu nia naran, tanba sei haree molok foti desizaun ba ida-ne’e no nomeia adjuntu hirak ne’e. Maibé ema hirak ne’ebé atu priense ba ba estutura Adjuntu CAC tenke sidadaun timoroan ne’ebé iha esperiénsia ba setór justisa no servisu administrasaun públika.
Tanba lei CAC ne’e hateten, sidadaun ne’ebé kaer kargu Adjuntu Komisáriu CAC ne’e atu servisu los de’it ba CAC, labele halo tán servisu sira seluk.
Rui haktuir, momentu halo kontatu ona ho Prokuradór Jerál Repúblika, Alfonso Lopez, hodi autoriza nia kuandru prokuradór balun atu priénse kargu ida-ne’e, hodi ajuda servisu iha CAC bele lao di’ak liután.
“Ha’u komunika ho PGR maibé sira la autoriza sira-nia kuadru prokuradór, tanba sira uituan hela”, nia dehan.
Tuir lei númeru 8/2009- 15 jullu kona-ba Kriasaun Komisaun Anti-Korrupsaun hateten Komisáriu Komisaun Anti-Korrupasaun nomeia husi Governu no Parlamentu Nasionál apresia hafoin fó pose.
Jornalista: Natalino Costa
Editór : Zezito Silva

