UNTL apresia voluntáriu JICA ne’ebé lori mudansa signifikativu
DILI, 21 agostu 2024 (TATOLI) – Adjuntu Dekanu Kooperativa no Peskiza-Fakuldade Enjeñaria no Teknolojia, Universidade Nasionál Timor Lorosa’e (UNTL), Domingos de Sousa Freitas, hateten voluntáriu husi Ajénsia Kooperasaun Internasionál Japaun (JICA) lori mudansa signifikatiavu ba setór saúde no edukasaun.
“Sira-nia prezensa ajuda duni ami dosente sira iha UNTL tanba ami mós menus profesór sira. Sira-nia aprezentasaun tuir dadus ne’ebé iha ona katak kona-ba ami-nia estudante sira no ami rasik admite katak sira-nia abilidade matemátika nian sei iha média nia okos, no tenke hadi’a ona iha nivel eskola primária to’o eskola sekundária no se ida-ne’e hametin karik iha universidade sei la’e, ita sai problema ida ne’ebé maka’as liu, Domingos de Sousa Freitas informa iha salaun Suai Room Timor Plaza, ohin.
Nia husu ba JICA atu kontinua haruka voluntáriu sira mai UNTL hodi fó apoiu iha aprendizajen Fízika no Matemátika iha ne’ebé fiar katak apresiasaun husi voluntáriu JICA bele deteta kualidade ensinu iha UNTL.
“Ha’u rekomenda ba JICA atu kontinua haruka voluntáriu sira mai UNTL hodi fó apoiu iha aprendizajen Fízika no Matemátika iha ne’ebé fiar katak apresiasaun husi voluntáriu JICA bele deteta kualidade ensinu iha UNTL”, nia informa.
Iha fatin hanesan, Reprezentante Xefe JICA, iha Timor-Leste Mimpei Ito, esplika oras ne’e daudaun, iha voluntáriu JICA 24 mak servisu iha Timor-Leste iha área oioin. Sira na’in-sia servisu iha setór saúde, ema na’in-ualu servisu iha setór edukasaun, fízika no desportu, ema na’in -tolu servisu iha setór edukasaun no ida seluk servisu iha setór dezenvolvimentu ambientál, edukasaun, ambientál no turizmu.
“Ami kontinua programa voluntáriu JICA nian hafoin pandemia Covid-19, no agora ami iha voluntáriu JICA oioin, ne’ebé fó vitalidade ba ami ba programa JICA nian. Ohin, voluntáriu na’in-haat sei aprezenta progresu husi sira-nia atividade no dezafiu sira, iha lian Tetum. Entaun ba partisipante sira, halo favor rona aprezentasaun no fó sira nia hanoin ba atendimentu ne’ebé di’ak liután”, nia esplika.
Nia husu ba voluntáriu sira JICA nian atu hatudu parte di’ak ema Japaun nian, hanesan respeita ema seluk, hatudu kompromisu ba serbisu, pontualidade no uza tempu ne’ebé restu ho matenek.
Nia relata ho diskusaun ohin nian sei fó indísiu sira kona-ba progresu serbisu voluntáriu ida-idak nian no mós hanoin ruma ba kolaborasaun iha futuru.
Jornaliista : Felicidade Ximenes
Editór : Zezito Silva
