Espesialista investigadór 24 simu posse

DILI, 22 agostu 2024 (TATOLI) – Komisaun Funsaun Públika (KFP) fó posse ba espesialista investigadór hamutuk 24 husi Komisaun Anti-Korrupasaun (CAC, sigla portugés).
Investigadór hirak ne’e, CAC rekruta dezde 2022 no halao estájiu durante tinan ida-resin iha CAC. Espesialista hirak ne’e hamutuk na’in-neen mak sei koloka ba asuntu investigasasaun, na’in-ualu ba apoia servisu administrasaun kooperasaun finansa nian no 10 mak apoia servisu prevensaun.
Adjuntu Komisáriu Komisaun Funsaun Públika ba Prevensaun no Boa Governasaun Agapito da Conceição, sente onradu bo’ot atu reprezenta Prezidente Komisaun Funsaun Públika atu mai serimónia tomada posse bá espesialista funsionáriu Anti-Korrupsaun .
“Ita hotu hatene katak papél ba Komisaun Anti-Korrupsaun hanesan papel ida ne’ebé nasaun presiza, oinsá halo prevensaun ba korrupsaun nian. Emposadu sira-nia papél mak tenke halo servisu ho profisionalismu no imparsiál bainhira halo investigasaun ruma ou halo prevensaun ruma bá korrupsaun sira atu hatudu servisu ho di’ak ho integridade ho imprasiál”, Agapito dedhan iha nia intervensaun bainhira partisipa serimónia toma pose ba espesialista investigadór CAC iha Sentru Formasaun Jurídiku Judisiáriu Caicoli, kinta, ohin.
Nia dehan, Komisaun Funsaun Públika sei servisu hamutuk ho CAC no PDHJ inklui Inspetór Jerál Estadu atu halo monitorizasaun no fiskalizasaun ba mákina Estadu, partikularmente funsionáriu públiku ne’ebé mak servisu Estadu.
Iha fatin hanesan, Komisáriu CAC, Rui Pereira husu ba espesialista investigadór na’in 24 atu halo servisu iha área investigasaun ne’ebé di’ak.
“Ha’u husu ba imi, tenke brani bainhira hodi halo investigasaun ruma liga ho kazu korrupsaun sira. Kuandu halo investigasaun ba kazu korupsaun hasoru pesoál ida, imi tenke brani. Sé imi mak la brani uluk ona ne’e oinsá. Ha’u husu imi buat ida mak ne’e, tenke kaer prinsípiu segredu instituisaun tanba investigasaun ne’e liga ema nia privasidade hotu”, nia afirma.
Rui hateten, espesialista investigadór CAC tenke halo investigasaun ne’ebé bazeia ba fatu, labele naran rona boatu depois halo investigasaun.
“Labele rona de’it boatus, imi halo ona investigsaun ba ema ida-ne’e, ida-ne’e labele akontese, kuandu investigadór ida mak komete hahalok ne’e, CAC horsida sei loke fali prosesu hasoru espesialista investigadór ne’e”, nia adianta.
Jornalista: Natalino Costa
Editór : Zezito Silva

