Delegasaun Vaticano apresia preparativu seguransa Timor-Leste

DILI, 26 agostu 2024 (TATOLI) – Ministru Interiór, Francisco da Costa, hateten delegasaun Vaticano apresia preparativu seguransa Timor-Leste hodi simu vizita Amu Papa.
“Sim, sira hasoru ona ami, iha diskusaun ne’ebé kapas tebes, sira apresia ita-nia aprezentasaun ba segurasa ba Papa nia vizita, sira kontente tebes no sira prontu servisu hamutuk ho ita durante vizita Amu Papa”, Francisco da Costa hateten ba jornalista iha nia kna’ar fatin Notariadu Mandarin, segunda, ohin.
Governante ne’e haktuir, delagasaun Vaticano husu ba Ministériu Interiór atu fó seguransa másima durante Amo Papa nia vizita.
“Ohin ami akompaña delegasaun Vaticano mai halo inspesaun iha ne’e (Igreja Katedrál) tanba fatin ida ne’e mós, nudar fatin ida ba vizita Amu Papa nian no ohin sira husu atu fó seguransa másima ba fatin sira ne’ebé Amu Papa sei vizita ba”, nia adianta.
Ministru Francisco fundamenta katak Ministru Interiór seidauk simu lista lolos katak ema na’in hira mak atu partisipa iha serimónia misa Papa nia iha Tasi-Tolu.
“Ha’u atu hateten de’it katak ita la haree ba ema na’in hira maibé atu hateten katak seguransa ne’e preparadu atu hasoru eventu ida-ne’e”, nia konklui.
Jornalista: Natalino Costa
Editór : Zezito Silva

