Top

Vatikanu husu no hili timoroan ida akompaña Amu Papa durante vizita

Ministru Interiór, Francisco da Costa Guterres. Imajen Tatoli/Egas Cristóvão

DILI, 26 agostu 2024 (TATOLI) – Vatikanu hili sidadaun timoroan ida atu sai ajudante ba Papa Francisco iha ámbitu vizita Timor-Leste.

“Ha’u atu hateten katak ita tenke orgullu tanba Vatikanu hili ita-nia ema sai ajudante ba Amu Papa durante nia vizita iha Timor-Leste, orgullu ida ba ita hanesan timoroan, buat sira ne’e akontese tanba sira haree ita-nia seguransa lao di’ak tebes, tanba ne’e mak Vatikanu mak husu, se bele Timor-Leste oferese nia sidadaun sai Ajudante ba Amu Papa durante nia vizita mai Timor-Leste”, Ministru Interiór, Francisco da Costa, hateten ba jornalista sira hafoin akompaña delegasaun hodi halo inspesaun ba Igreja Katedral, segunda, ohin..

Nia dehan, sai ajudante laos buat fasil, liuhusi prosesu barak, lingua tenke hatene, aspeitu tátiku inklui buat balun espesífiku, nia tenke domina no sidadaun timoroan ne’e priénse buat hirak ne’e.

“Ho vizita sua santidade Papa Francisco nian, ita hotu tenke agradese tanba ita iha nia sidadaun ida bele sai ajudante ba Amo Papa”, Nia konklui.

Ministru afirma katak sei la fó sai identidade timoraoan nian ne’ebé sei akompaña Amu Papa, maibé atu hateten katak ema ne’e iha kapasidade.

“Ha’u lakohi koalia sai ema ne’e nia identidade katak, nia ne’e husi institusaun polísia ka militár, maibé ha’u atu hateten de’it katak nia sidadaun timoroan ne’ebé iha intelijente, kapasidade, abilidade no priénse hodi halo funsaun hanesan ajudante”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!