DILI, 27 agostu 2024 (TATOLI) – Governu liuhusi reuniaun Konsellu Ministru, tersa ne’e, aprova projetu Rezolusaun Governu, ne’ebé aprezenta husi Primeiru-Ministru, Kay Rala Xanana Gusmão, hodi fó doasaun ho valór millaun $2,5, ba Rejiaun Autónoma Madeira Portugal hodi suporta rekuperasaun ba estragu ne’ebé kauza husi inséndiu ne’ebé estraga illa Madeira.
“Inséndiu ida ne’ebé hahú iha loron 14 fulan-agostu tinan 2024 iha área munisípiu Ribeira Brava, ne’ebé da’et ho lalais ba munisípiu Câmara de Lobos, Ponta do Sol no Santana. Ahi ne’e estraga área floresta ektare rihun sia-resin, ne’ebé kobre área ida liu 14% hosi área floresta illa nian,” tenik iha nota ne’ebé Agência TATOLI asesu hosi media Gabinete Primeiru-Ministru.
Governu Timor-Leste, iha espíritu solidariedade no kompromisu ho kooperasaun entre povu sira, hato’o ninia apoiu ba povu maun-alin portugés no ba populasaun illa Madeira, liuhusi doasaun ne’e hodi tulun rekuperasaun ba estragu sira ne’ebé kauza husi inséndiu.
Área ne’ebé iha inséndiu mosu iha loron 14 fulan-agostu iha illa Madeira, no deklara ona extinguidu iha loron-segunda ne’e, atinje ektar 5.104,1, haktuir dadus sira husi Sistema Europeu Informasaun Inséndiu Floresta nian (Copernicus).
Atualizasaun ne’ebé fó sai hosi ajénsia europeia refere ba dadus sira ne’ebé halibur to’o besik tuku 12 lorokraik iha loron-segunda, loron 13 no ikus hosi inséndiu. Iha Segunda-feira, autoridade sira deklara katak ahi “mate kompletamente”.
Planu Rejionál Emerjénsia no Protesaun Sivíl Madeira nian, ne’ebé ativa tiha ona iha loron 17 fulan-agostu, la vigora ona.
Inséndiu rurál iha illa Madeira mosu iha loron 14 fulan-agostu iha foho sira hosi munisípiu Ribeira Brava, progresivamente da’et ba munisípiu sira Câmara de Lobos, Ponta do Sol no Santana.
Durante loron sira ne’ebé ahi lakan, autoridade sira fó konsellu ba ema na’in 200 resin atu sai hosi sira nia uma hanesan prekausaun ida no fornese instalasaun sira resepsaun públika nian, maibé rezidente barak maka fila ba uma.
Bombeiru balun hetan tratamentu tanba esgotamentu ka kanek ki’ik, no laiha tan kanek.
Kombate ahi-lakan sira sai difisil tanba anin no temperatura aas, maibé, tuir Governu Estadu nian, laiha relatóriu sira kona-ba kanek sira ka destruisaun hosi uma sira no infraestrutura públika esensiál sira, maski produsaun agríkola ki’ik balun hetan afetadu, aleinde área floresta sira .
Polísia Judisiáriu investiga hela kauza sira hosi inséndiu ne’e, maibé prezidente hosi ezekutivu Madeira nian, Miguel Albuquerque, hatete katak ne’e hanesan inséndiu.
Jornalista: Hortencio Sanchez
Editór: Florencio Miranda Ximenes
