PM Xanana apresia Firma BlackRock apoiu BCTL halo investimentu ba Fundu Minarai
DILI, 27 agostu 2024 (TATOLI)– Primeiru-Ministru (PM), Kay Rala Xanana Gusmão apresia ho parseiru Firma BlackRock hanesan External Fund Manager ne’ebé durante ne’e servisu hamutuk ho Banku Sentrál Timor-Leste (BCTL, sigla portugés) hodi ajuda halo investimentu ba Fundu Minarai Timor-Leste nian.
Apresiasaun ne’e Primeiru-Ministru hato’o durante reuniaun ho dirijente sira husi BlackRock akompaña husi Governadór BCTL, Helder Lopes iha Palásiu Governu, tersa (27/08/2024).
“Primeiru-Ministru apresia ho kooperasaun ne’ebé BCTL halo, no sira-nia kontribuisaun iha investimentu Fundu Minarai ne’ebé hatama retornu oituan husi investimentu ne’e,” Helder Lopes hateten ba jornalista sira iha Palásiu Governu, tersa ne’e.
Governadór BCTL ne’e informa, mandatu ne’ebé Timor-Leste fó ba BlackRock ne’e atu halo investimentu ba fundu minarai TL hamutuk 12,3% iha parte equity ka asaun nian.
BlackRock nu’udár parseiru ne’ebé ajuda halo investimentu ba Fundu Minarai TL nian iha merkadu internasionál liuhusi estabelesimentu akordu kooperasaun ho BCTL dezde tinan 2013 to’o agora.
“Tanba ita servisu hamutuk normalmente mai ko’alia ho Banku Sentrál hodi hametin kooperasaun, kompriende sira-nia dezempeñu servisu, entaun aproveita biban hasoru-malu ho Primeiru-Ministru hodi atualiza sira-nia servisu tuir Lei Timor-Leste nian,” Helder Lopes haktuir.
BlackRock mak empreza investimentu multinasionál Amerikanu ida ne’ebé ninia sede iha sidade Nova Iorke ne’ebé estabelese iha tinan 1988, orijinalmente servisu iha jestaun risku no jestór ativu ho rendimentu fiksu, hanesan mós jestór ativu bo’ot liu iha mundu, ho ativu biliaun $10 iha jestaun to’o Janeiru 2022. BlackRock halo operasaun globalmente ho eskritóriu 70 iha nasaun 30 no kliente sira iha nasaun 100.
Eis Vise Ministru Finansas ne’e mós atualiza dezempeñu Fundu Minarai bá Xefe Governu katak, hahú fulan-Janeiru to’o Jullu 2024 balansu Fundu Minarai biliaun $18.6.
Husi ne’e aloka ka investe iha portofóliu investimentu tolu mak hanesan investimentu iha títulu hamutuk biliaun $12.5, equity ka asoens hamutuk biliaun $5.4, no investimentu iha Timor GAP liu-liu sosa asaun iha Greater Sunrise.
Janeiru to’o 31 jullu povu Timor-Leste nia fundu konsege hetan retornu investimentu hamutuk millaun $950, hosi fa’an mina no gás hamutuk millaun $70. Bainhira tau-hamutuk iha periúdu hanesan reseita ne’ebé tama bá Fundu Minarai hamutuk biliaun $1.200.
Hosi janeiru to’o jullu Governu foti osan millaun $650 hodi finansia despeza Estadu. Levantamentu ne’e halo dala-tolu, millaun $300 halo iha fulan-Fevereiru, millaun $200 iha Abríl no millaun $150 halo iha Jullu.
Jornalista: Hortencio Sanchez
Editór: Florencio Miranda Ximenes
