Tékniku Ministériu Justisa diskute artigu husi projetu proposta lei-kódigu rejistu sivil

DILI, 27 agostu 2024 (TATOLI) – Ministru Justisa Sergio Hornai, hateten ekipa tékniku Ministériu Justisa halo ona diskusaun ba kada artigu husi projetu proposta lei-kódigu rejistu sivil molok lori ba Konsellu Ministru hodi halo aprovasaun.
“Projetu proposta lei-kódigu rejistu sivil ne’e ha’u simu ona no ha’u despaisa ona ba ekipa tékniku Ministériu Justisa atu haree fali projetu lei ida-ne’e. Projetu lei ida-ne’e presiza halo diskusaun ne’ebé klean iha nia artigu sira hodi ajusta tán buat balun, halo alterasaun balun atu refleta ba ita-nia realidade, molok submete ba Konsellu Ministru hodi halo aprovasaun finál”, Hornai dehan ba jornalista sira iha nia kna’ar fatin Ministériu Justisa Colmera, tersa, ohin.
Nia dehan, Kódigu Rejistu Sivil ne’e forma ida atu bele rejista sidadaun sira hotu nia identidade relijoza tantu nia moris, nia la halo afiliasaun ba interese sira seluk.
“Bom, ita hotu hakarak hodi bele proteje ema hotu nia direitu ba kazamentu relijioza, tantu Katolika, Protestante no mós Musulmanu sira. Sira bele hetan rekoñesimentu transversál ho ita-nia kódigu rejistu sivil ne’ebé mak atu mai”, nia afirma.
Governante ne’e esplika, Kódigu Rejistu Sivil ida-ne’e bele hametin liután ba kazamentu sira ne’ebé mak ita halao, por ezemplu; kazamentu barlakeadu, kazamentu rejistu sivil no mós kazamentu Katoliku ne’ebé iha.
“Dala barak ema hateten ita-nia Kódigu Sivil tanba sá mak agora fó de’it rekoñesimentu ba kazamentu Katóliku, enkuantu kazmentu husi konfisaun relijioza sira seluk laiha. Prontu buat sira ne’e hotu sai hanesan hanoin ida ba lei Kódigu Rejistu Sivil hodi ita presiza halo diskusaun klean, halo alterasaun para bele ajusta ba ita-nia realidade no mós ba ita-nia demanda sosiedade agora daudaun ita enfrenta”, nia adianta.
Nia dehan, projetu proposta lei-kódigu rejistu sivil sei fó tratamentu hanesan ba sidadaun sira husi konfisaun relijioza Katolika, Protestante no Musulmanu.
“Lei ida-ne’e ita hakarak sei fó tratamentu hanesan ba sidadaun sira husi relijiaun Katolika, Protestante no Muzulmanu liga ba kazamentu sivil no lei ida-ne’e sei la halo diskriminasaun ba sidadaun sira”, nia hateten.
Nia garante katak fulan ida-ne’e sei konklui diskusaun ba kódigu rejistu sivil no fulan oin sei aprezenta ba Konsellu Ministru hodi halo aprovasaun finál.
Jornalista: Natalino Costa
Editór : Zezito Silva

