DILI, 27 agostu 2024 (TATOLI) – Prezidente Repúblika José Ramos hateten, fulan-outubru sei vizita Munisípiu Viqueque liu-liu Postu Administrativu Uatulari, Uatukarbau, ba to’o aldeia, suku balun lori mós membru Governu balu atu rona direita preokupasaun povu nian iha área rurál.
“Ba Vizita Viqueque sei lori ho membru Governu balun, ba durante loron lima ou neen hanesan ne’e, atu rona direita saida mak ita nia povu presiza no tenke rezolve duni,” Xefe Estadu hateten ba jornalista sira iha Palásiu Prezidensiál Dili, tersa ne’e.
Horta dehan, atividade mak ba haree família balun ne’ebé moris aat tebes, susar atu hetan ai-han, uma aat Governu tenke iha obrigasaun atu fó tulun.
“Lori ajuda umanitáriu, ha’u sei haree membru Governu, liu-liu Ministru Agrikultura Peska, Pekuária no Floresta (MAPPF), Ministra Solidaridade Sosiál no Inkluzivu (MSSI) tanba Viqueque importante tebe-tebes ba setór agrikola, ha’u hakarak hatene Governu halo saida iha setór agrikóla, apoiu saida mak Governu fó,” PR Horta dehan.
Tuir nia, di’ak liu ba ho membru Governu balun, bainhira populasaun halo pedidu ruma ne’ebé bo’ot, estrada ba kada Suku apoiu traktór irigasaun Governu mak bele fó resposta.
Iha vizita ne’e sei lori mós doutor tanba fatin balun sira nunka haree doutor ida, nune’e lori doutor atu halo checkup sira hotu-hotu, no lori aimoruk kompletu no Prezidente Repúblika mak sosa atu halo tratamentu ba populasaun sira iha Munisípiu Viqueque.
Jornalista: Hortencio Sanchez
Editór: Rafael Ximenes de A. Belo
