Ekipa instala ona mákina produsaun pasaporte maibé seidauk funsiona
DILI, 02 setembru 2024 (TATOLI) – Diretór Jerál Servisu Rejistu Notaridu (DGSRN), Agostinho Gonçalves Viera, hateten ekipa tékniku husi Empreza Thales akompaña husi ekipa tékniku husi Notariadu halo ona instalasaun ba mákina produsaun pasaporte ne’ebé hola husi Finlándia, maibé seidauk utiliza tanba tékniku sira sei tuir formasaun.
“Sim, mákina produsaun pasaporte rua ho naran Tesla ne’ebé ita hola iha Filándia ne’e, ekipa téknika husi Empreza Thales ne’ebé hetan akompañamentu husi tékniku husi Notariadu halo ona instálasaun iha kinta semana kotuk liu ba. Iha prosesu Instalasaun, partisipa direta husi Ministru Justisa Sergio Hornai”, Agostinho Gonçalves, dehan ba jornalista sira iha nia kna’ar fatin Notaridu Mandarin, Segunda, ohin.
Nia afirma, produsaun ba passaporte provizoriamente seidauk tanba ekipa IT husi Notariadu sei tuir formasaun.
“Mákina rua ne’e seidauk halo emisaun ba pasaporte tanba ekipa IT husi Notariadu sei tuir formasaun ne’ebé oferese husi ekipa tékniku husi Empreza Thales. Kuandu ita-nia ekipa notartiadu finaliza ona formasaun ne’e mak ita foin utiliza mákina rua ne’e”, nia afirma.
Nia dehan, mákina rua ne’e ho kualidade produsaun di’ak, loron id abele prodús pasaporte hamutuk 400.
“Iha kinta semana kontuk ne’e, hafoin ekipa sira halo tiha instalasaun sira, ekipa sira halo kedan teste emisaun ba passaporte no iha prosesu emisaun ne’e, mákina rua ne’e prodús ho kualidade di’ak no laiha problema”, nia adianta.
Nia konklui katak utilizasaun ba mákina produsaun iha posibilidade sei funsiona iha setembru nia-laran.
Jornalista: Natalino Costaº
Editór : Zezito Silva
