Top

KPK 300 sei apoia PNTL fó seguransa iha ámbitu vizita Papa

Konsellu Polisiamentu Komunitáriu (KPK), Munisípiu Díli tuir formatura jeral, iha Komandu Jerál Kaikoli, tersa (03/09). Ekipa KPK ne'e sei ajuda Komandu Konzuntu Forsa Tarefa Polísia nian iha momentu vizita Papa Francisco mai Timor-Leste. Imajen Tatoli/Francisco Sony

DILI, 03 setembru 2024 (TATOLI) – Komandante PNTL Munisípiu Dili Superintendente Xefe Polísia Orlando Gomes, hateten Konsellu Polísiamentu Komunitáriu (KPK), 300 sei apoia Polísia Nasionál Timor-Leste hodi fó seguransa iha ámbitu vizita Amu Papa.

Konsellu Polísiamentu Komunitáriu 300 mai husi Suku Becora, Suku Vila Verde, Suku Bairro Pite no Suku Comoro.

“Ohin ita halo formatura jerál ba ita-nia Konsellu Polísiamentu Komunitáriu hodi sira simu orden husi Polísia oinsá atu servisu hamutuk ho polísia asegura vizita Amu Papa”, Orlando Gomes hateten ba jornalista sira iha Komandu PNTL Dili, Caicoli, tersa, ohin.

Nia dehan, servisu KPK ne’e hodi ajuda autoridade, konsellu suku no polísia komunitaria hodi halo prevensaun iha idaidak nia bairro.

“Ho ida-ne’e polísia haree katak sira ne’e ita presiza envolve iha atividade vizita Papa ne’e, hodi sira kontribui fó sira-nia kontribuisaun ba seguransa iha momentu sira importante ne’e”, nia adianta.

Iha fatin hanesan, Komandante Komandu Operasaun PNTL Superintendente Xefe Polísia, José Soares hateten, Komandu Jerál PNTL konvida KPK mai iha ne’e atu tuir formatura jerál hodi fó simu orientasaun balun husi Komandu PNTL oinsá KPK bele servisu hamutuk ho Polísia hodi fó seguransa ba vizita Papa nian.

“Sira ne’e ita sei koloka iha dalan sira hodi ajuda polísia no forsa tarefa konjunta sira oinsá atu organiza ita-nia komunidade sira hodi forma iha dalan bainhira Amu Papa liu no oinsá atu organiza komunidade sira atu ba tuir misa iha Tasi-Tolu”, nia konklui.

Jornalista: Natalino Costa

Publisidade

Leave a Reply

Latest Post

error: Content is protected !!