DILI, 03 setembru 2024 (TATOLI) – Oknum Polísia Nasionál Timor-Leste (PNTL) ho deviza ajente prinsipál ida ho naran inisiál AC ho kondisaun lanu iha karaoke no entrega pistol aba ema sivil.
Oknum polísia ne’e hala’o mós Servisu Informasaun ne’ebé destakdu iha Munisípiu Dili, iha ne’ebé madrugada, iha segunda (02/09), karaoke ida besik Eskuadra Polísia Dom Aleixo, Suku Comoro, hemu ho kondisaun lanu depois entrega pistol aba ema sivil atu uza.
Iha fatin karaoke, ema sira telefone ba polísia no Servisu Informasaun Polísia (SIP) Nasionál ida ba kedan fatin akontesimentu no hodi husu ba AC katak tanba saida mak entrega arma ba fali ema sivil, iha momentu inkéritu, pistola iha hela ema sivil nia-liman no AC ho kondisaun lanu no dudu monu pesoál SIP no rezulta kanek grave iha ulun. Husi asaun ne’e, mosu kedan dezentendimentu no pesoál SIP konsege asegura arma refere.
Ho kazu ida ne’e, vítima husi SIP Nasionál hato’o ona keixa ba Departamentu Investigasaun Kriminál (DIK) hodi prosesa ba oin.
Hatan ba kazu ne’e, Komandante PNTL Munisípiu Dili Superintendente Xefe Polísia Orlando Gomes, katak dezentedimentu ne’e akontese, bainhira oknum PNTL ida destaka iha Servisu Informasaun Polísia iha Munisípiu Dili ho inisiál AC ba karaoke no hemu tua lanu depois entrega fali pistola ba ema sivil hodi kaer.
“Hahalok ida-ne’e konsidera viola lei PNTL kona-ba utiliza arma, kazu ida ne’e ita sei foti medidas sériu hasoru oknum membru PNTL ho naran inisiál AC, nu’udar ajente prinsipál destakadu iha Servisu Informasaun Polísia iha Munisípiu Dili, hahalok ida-ne’e hatudu atitude ne’ebé ladi’ak iha terenu. Kuandu iha ona keixa ba kazu ne’e, ita konsidera ona krime no ita sei loke prosesu ba oknum ne’e”, Orlando Gomes hateten ba jornalista sira iha Komandu PNTL Dili, Caicoli, tersa, ohin.
Nia dehan, kazu ne’e rejista ona iha DIK, sira mak sei halo relatóriu ba Komandu Jerál PNTL hafoin komandu foti medida hodi prosesa tuir lei disipliñar hasoru oknum PNTL AC.
“Komandu PNTL tenke foti medidas sériu, tanba ida-ne’e krime, viola regra Instituisaun PNTL nian. Kazu ida-ne’e ita sei foti medidas sériu hasoru Oknum PNTL ho naran inisial AC, nu’udar ajente prinsipál destakadu iha Servisu Informasaun Polísia iha Munisípiu Dili, tanba nia hatudu atitude ladi’ak iha terenu”, nia adianta.
Gomes alerta. elementu polísia ne’ebé halo servisu iha terenu tenke kumpre regra no hakruk ba lei orgánika PNTL no lei disipliñar ne’ebé aplika iha PNTL.
Iha sorin seluk, Komandante Komandu Operasaun PNTL Superintendente Xefe Polísia, José Soares, dehan kazu ne’e komandu Jerál PNTL simu ona relatóriu, depois halo investigasaun mak foin bele hatene nia rezultadu.
“Kazu ne’e akontese ona, depois ita halo investigasaun mak ita foin hatene, prosesu disipliñar no kriminál nian ita kanaliza ona ba Ministériu Públiku”, nia informa.
Nia subliña, Instituisaun PNTL eziste, iha nia regulamentu interna rasik hanesan lei orgánika PNTL ho disipliñar sira.
“Bainhira elementu polísia se de’it mak halo servisu tenke respeitu regulamentu sira ne’e, tanba lei ne’e vale ba PNTL hotu atu kumpre”, nia konklui.
Jornalista: Natalino Costa
Editór : Zezito Silva
