Xina hakarak koopera ho Timor-Leste hodi dezenvolve setór agrikultura
DILI, 03 setembru 2024 (TATOLI) – Embaixadora Xina iha Timor-Leste, Wang Wenli, hateten, Governu Xina hakarak servisu hamutuk ho Governu Timor-Leste hodi dezenvolve área rurál.
Insiativa Governu Xina ne’e aprezenta husi Embaixadora bainhira hasoru malu ho Vise Primeriu Ministru, Mariano Assanami Sabino, iha Palasiu Governu.
“Ha’u ko’alia kle’an tebes ho Vise-Primeiru-Ministru hanesan Ministru Dezenvolvimentu Rurál Abitasaun Komunitariu, Xina hakarak tebes servisu hamutuk ho Governu Timor-Leste iha dezenvolvimentu rurál,” Embaixadora ne’e hateten ba jornalista sira iha Palásiu Governu Dili, tersa ne’e.
Nia dehan, Timor-Leste iha potensiál ba agrikultura iha área rurál ne’ebé seidauk dezenvolve ho di’ak. Tanba ne’e Xina hakarak hamutuk ho Governu Timor-Leste hodi dezenvolve hodi garante seguransa alimentár iha nasaun ne’e.
“Importánsia boot kona-ba agrikultura iha nasaun ne’e, durante Prezidente Repúblika José, Ramos Horta, iha Xina konsege asina akordu lubuk ida iha área agrikultura nian, agora depende ba vontade Governu Timor-Leste ba implementasaun, Xina prontu atu apoiu,” nia tenik.
Diplomata Xineza ne’e afirma katak, bainhira Governu Timor-Leste hakarak implementa akordu kooperasaun ne’ebé nasaun rua selebra ona, Xina laiha rezerva atu fó apoiu.
“Maibé Ministru Agrikultura Timor-Leste nian sei vizita tan Xina iha tempu besik atu haklean liutan kooperasaun ne’ebé parte rua asina ona ne’e, ita hein katak sei iha sinál pozitivu ba implementasaun,” nia katak.
Alende kooperasaun iha agrikultura, Xina mós prontu atu apoiu Timor-Leste iha área edukasaun hodi oferese bolsa estudu ba timoroan sira atu ba hasai kursu iha mastradu no PsD iha área oioin.
“Xina prontu atu fó apoiu ba timoroan sira ne’ebé hakarak ba estuda iha Xina, estuda iha área oioin kona-ba mastradu, PsD no seluk tan,” nia hakotu.
Jornalista: Hortencio Sanchez
Editór: Florencio Midanda Ximenes
