DILI, 05 setembru 2024 (TATOLI) – Komandante Komandu Operasaun Komandu Jerál Polísia Nasionál Timor-Leste (PNTL), Superintendente Xefe Polísia, José Soares, hateten Ekipa Forsa Tarefa Konjunta enkontru ho Adidu Seguransa Embaixada hamutuk 17 ne’ebé akreditadu iha Timor-Leste, hodi atualiza preparasaun simu Sua Santidade Papa Francisco.
“Ohin dia 5 de setembru 2024, Komandu Jerál Polísia Nasionál Timor-Leste liuhusi Forsa Tarrefa Konjunta halo security briefing ba adidu seguransa no staff sira ne’ebé mak akreditadu iha Timor-Leste, atu hatene kona-ba vizita Papa mai Timor-Leste, hahú dia 9 to’o 11 setembru 2024”, José Soares hateten ba jornalista sira hafoin enkontru ho adidu sira iha Komandu Jerál PNTL, Caicoli, kinta ne’e.
Komandante ne’e dehan, reuniaun ida-ne’e importante, atu atualiza ba adidu sira kona-ba prepativu no prezensa Amu Papa nian iha Timor-Leste.
José salienta, ekipa forsa tarrefa konjunta mós informa ba adidu embaixada sira iha Timor-Leste iha ámbitu vizita Papa. PNTL sei blokeia estrada protokolu ne’ebé Papa sei liu.
“Ita mós ohin informa ba sira katak iha ámbitu vizita Papa nia ne’e rute ka dalan sira iha kapitál Dili sei taka. Ida-ne’e ita presiza informa ba sira para sira bele hatene hodi bele kumpre regra ne’ebé komisaun ba vizita Papa nian hatún ona. Regra sira ne’ebe komisaun fó sai ba sarani sira ita sei aplika mós ba korpu diplomaÁtiku sira ne’ebé halo sira-nia misaun iha ita-nia rai”, nia afirma.
Nia dehan, liuhusi enkontru ne’e adidu seguransa husi Emabaixada 17 ne’ebé akreditadu iha Timor-Leste hato’o sira-nia protidaun hodi kolabora ho ekipa forsa tarefa konjunta hodi fó apoiu ba asegura vizita Sua Santidade Papa.
“Informasaun sira ne’e mak ita fó ba sira no sira mós hateten katak karik sira identifika buat ruma, ameasa ruma, informasaun ruma, sira pasa kedan ba ita-nia autoridade seguransa atu bele toma atensaun”, nia konklui.
Jornalista:Natalino Costa
Editór : Zezito Silva
