DILI, 05 setembru 2024 (TATOLI)—Prezidente Repúblika (PR), José Ramos Horta no Primeiru-Ministru (PM), Kay Rala Xanana Gusmão, apelu ba joven sira atu hatudu pás no dezenvolvimentu tanba durante Papa Francisco nia vizita Apostóliku ba dala-45, iha ema barak mak akompaña situasaun iha Timor-Leste.
“Ha’u apelu tebes ba joven sira katak bainhira Papa mai tenke hatudu ba mundu ida-ne’e katak rai ida-ne’e hakarak pás no dezenvolvimentu. Prezidente Repúblika apelu ba joven atu hatudu nafatin ba mundu, katak ita hanesan rai ida-ne’ebé seidauk dezenvolvidu no loos rai barak ukun-an, iha rai balun ne’ebé ukun-an tinan 70 ba leten, maibé a’at liu ita. La’ós ita gaba-an, maibé ita la’o nafatin no dudu dezenvolvimentu nune’e ukun ba ita no sira hotu,” PM Xanana hato’o hafoin enkontru semanál ho PR Horta, iha resintu Palásiu Prezidensiál, Bairru-Pité, kinta ne’e.
Aleinde ne’e, PR Horta apresia tebes ho Governu, ne’ebé organiza Sekretáriu-Jerál Organizasaun Nasaun Unida (ONU), António Guterres, UNAMET Ian Martin no bainaka espesiál sira-nia vizita iha ámbitu komemorasaun loron Konsulta Populár ba dala-25 iha loron 30 agostu liubá, tanba buat hotu la’o di’ak no susesu.
“Ohin ami rua ko’alia, Prezidente Repúblika apresia tebes no ami rua hamutuk agradese tebes ba povu tomak, komunidade, liu-liu joven sira. Tanba iha festividade 30 agostu la akontese buat ida. Ida-ne’e mak hatudu loloos, UNAMET Ian Martin mai, Sekretáriu Jerál ONU mai, ne’ebé temi katak iha pás, demokrasia, no iha loron 31 agostu rona buat ida la akontese. Ita kontente tebes no ita-nia kompromisu ba pás no não violénsia. Nune’e Prezidente Repúblika fó parabéns. Ida-ne’e mak ohin ami ko’alia,” PM Xanana, relata.
Notísia relevante : Xefe Estadu louva Governu halo preparasaun di’ak simu Papa Francisco
Biban ne’e, PM Xanana informa mós kona-ba preparasaun transporte ba Papa Francisco nia vizita Apostólika ba dala-45 iha Timor.
“Halo tiha ona reuniaun ho Prezidente Autoridade Munisipál sira, problema mak transporte ninian, ne’ebé ami haree daudaun ona, hanesan ita tenke haree karik Loro-sa’e ninian, Lautém mai uluk karreta fila bá, karreta sira Viqueque mai tan fila hotu, bá lori fali bá Baucau ninian, mai filafali lori Manatuto nian,” Xefe Governu hateten.
Nia relata, husi Suai nian karreta presiza karik husi munisípiu Ainaru ajuda lori tiha mai, Bobonaro nian lori tun mai Ainaru nian karreta sira mai tiha bá fali lori mai, bá fali Same lori mai, Aileu mós tun, Liquiçá besik, Ermera mai loos kedas ne’e hotu serbisu sei maka’as.
“Nune’e apelu dala-ida tan ba joven sira, ita hatudu tiha ona mundu tomak koñese ona ita nu’udar rai ida-ne’ebé violénsia laiha, rai ida-ne’ebé buka esforsu-an atu dezenvolve povu nia moris, ne’e duni Papa Francisco mai ne’e ita hotu-hotu tuur hakmatek,” nia katak.
Iha fatin hanesan, Xefe Estadu haktuir, enkontru ohin ko’alia mós kona-ba preparativu ba Papa Francisco nia vizita.
“Ami rua ko’alia kona-ba preparativu, klaru ha’u ladún iha papél jestaun no desizaun ne’e, ha’u laiha kompeténsia, maibé koordenasaun metin ho Governu no konferénsia Episkopál, buat hotu-hotu la’o di’ak,” nia tenik.
Biban ne’e, Horta husu mídia labele fó sai informasaun la loos kona-ba Prezidente Repúblika no Primeiru-Ministru hirus malu.
“Ohin ami-rua halo enkontru semanál,” Xefe Estadu, afirma.
Jornalista : Osória Marques
Editora : Julia Chatarina
