DILI, 06 Setembru 2024 (TATOLI) – Ekipa téknika husi Ministériu Agrikultura, Pekuária, Peska no Floresta (MAPPF) halo observasaun ba ró peska hamutuk 110 ne’ebé distribui ona ba peskadór rihun 7-resin iha territóriu hodi buka hatene sira-nia jestaun ba utilizasaun ekipamentu ne’e.
Diretór-Jerál Peska, Akikultura no Jestaun Rekursu Akuátiku, Celestino Barreto, hateten ministériu fahe ona ró, tanba ne’e iha obrigasaun atu la’o tuir fali hodi haree ekipamentu sira ne’e.
“Daudaun tékniku sira hala’o hela serbisu hodi update fali dadus peskadór rihun 7-resin ne’ebé hetan ona ró, sira utiliza oinsá, tanba iha ró hamutuk 110 mak ita fahe ona ba benefisiáriu sira”, Celestino Barreto hateten iha Comoro, ohin.
Diretór ne’e salienta katak bainhira ekipa sira halo observasaun ba sistema jestaun ne’ebé peskadór sira uza ba ró, sira mós sei foti fali dadus ba peskadór foun sira, nune’e bele prepara tan ró hodi disponibiliza ba sira hodi ajuda hasa’e rendimentu família nian.
“Bainhira ministériu iha ona dadus husi munisípiu ne’ebé poténsia ba peska, sei halo esforsu atu sosa tan ró foun hodi bele apoia sira”, dehan.
Iha sorin seluk, koordenadór grupu peska Hadi’a Moris, husi Liquiçá, Carlos dos Santos, dehan sira nia grupu ne’e harii iha 2022, maibé foin lalais ne’e sira la tama iha lista atu hetan apoiu ró, tanba sira la submete proposta, maibé tinan ida ne’e sira prepara ona hodi husu Ministériu Agrikultura apoia ró ida atu fasilita atividade peska.
“Ita iha ró ki’ik manuál ida ne’ebé ita hean ho liman de’it. Ita husu ba ministériu atu apoia tan ró foun ida atu hala’o atividade peska iha tasi laran”, salienta.
Iha Liquiçá rejista grupu hamutuk 1.000-resin, maibé foin iha grupu hamutuk 13 maka hetan ró husi ministériu. Tanba ne’e, nia husu bainhira MAPPF iha ona planu atu foti dadus foun ruma bele informa uluk ba sira, nune’e bele halo preparasaun hodi rejista.
Notísia relevante: Peskadór barak lahalo jestaun di’ak ba utilizasaun ró peska – MAPPF
Jornalista: Tomé Amado
Editora: Maria Auxiliadora
