Top

TLPDP disponibiliza rádiu komunikasaun 50 ba PNTL utiliza ba seguransa vizita Papa

Komandante Komandu Administrasaun PNTL Superintendente Xefe Polísia, Natercia Martins, hamutuk ho Xefe TLPDP Austrália iha Timor Leste Diminic Zappavigna asina termu entrega sasán ne'ebé TLPDP apoia ba PNTL. Foto Natalino Costa.

DILI, 06 setembru 2024 (TATOLI) – Komandante Komandu Administrasaun Polísia Nasionál Timor-Leste (PNTL), Superintendente Xefe Polísia, Natercia Martins, dehan  Timor-Leste Police Development Programe (TLPDP) Austrália apoia rádiu komunikasaun 50 ba PNTL hodi utiliza ba seguransa vizita Papa Francisco.

“Sasan sira ne’ebé TPLPD ohin apoia ne’e, radíu komunikasaun hamutuk 50 no rompi ba polísia atu uza hodi halo seguransa hamutuk 500. Sasan sira ne’e hodi fasilita ita-nia polísia sira liuliu ba kestaun operasionál atu bele responde ba seguransa durante vizita Amu Papa ne’ebé sei mai iha Timor durante loron tolu”, Natercia Martins hateten ba jornalista iha Komandu Jerál PNTL Caicoli, sesta, ohin.

Aleinde ne’e, TPLDP fó apoiu ba PNTL, partikulamente iha kapasitasaun rekursu umanu, infraestrutura halo edifísiu ba PNTL, apoia transporte, meiu hanesan rádiu no rompi hodi PNTL bele utiliza hodi halo seguransa.

“Sira fó apoiu ona ba ita-nia PNTL hanesan rádiu komunikasaun no iha setór infraetrutura sira ajuda PNTL, halo ona instalasaun torre ba rádiu komunikasaun iha fatin balun iha teritórriu Timor-Leste. Instalasaun ba torre ne’e iha fatin balun seidauk kompleta, maibé sira dehan nafatin apoia PNTL para kompleta instalasaun ba torre ne’e”, nia dehan.

Iha fatin hanesan, Xefe TLPDP Austrália Diminic Zappavigna, hateten apoia ida-ne’e pozitivu tebes tanba PNTL nudar parseiru di’ak.

“Apoia ida-ne’e PNTL sira uza ba seguransa vizita Papa no apoiu ida-ne’e bele suporta duni membru polísia ne’ebé halao kna’ar hodi fó seguransa ba vizita Amu Papa nian. Apoiu sira-ne’e bazeia ba planu estratéjiku TLPDP nian”, nia konklui.

Jornalista:Natalino Costa

Editór : Zezito Silva

Publisidade

Leave a Reply

Latest Post

error: Content is protected !!