PNTL detein suspeitu NSB ne’ebé tenta oho nia fen iha Comoro

DILI, 07 setembru 2024 (TATOLI) – Polísia Nasionál Timor-Leste (PNTL), Eskuadra Dom Aleixo, detein suspeitu ho inisiál NSB ne’ebé tenta oho nia fen ho inisiál B iha Aldeia Moris Foun, Suku Comoro, Postu Administrativu Dom Aleixo, Munisípiu Dili.
Kazu ne’e akontese iha sesta (6/9), tuku 14:00 loraik, mosu deskonfia entre suspeitu NSB ho nia fen ho inisiál B tanba de’it dehan suspeitu nia fen B ba selingku fali ho mane seluk.
Haree ba hahalok ida-ne’e mak suspeitu NSB la satifas no hirus hodi foti katana hodi taa nia fen iha nia dalan to’o monu ba rai no tenta halai hodi salva nia aan husi suspeitu.
Hafoin komete tiha kazu tentativa hasoru nia fen ne’e, viziñu sira kontatu kedan polísia no Departamentu Vulnerable Person Unit (VPU) Munisípiu Dili, dezloka kedan ba suspeitu nia uma ne’ebé lokaliza iha área Ponte Comoro III Aldeia Moris Foun, Suku Comoro, Postu Administrativu Dom Aleixo Munisípiu Dili hodi asegura kedan vítima no polísia lori kedan suspeitu NBS ba kedan eskuadra Dom Aleixo hodi halo detensaun.
Komandante PNTL Munisípiu Dili, Superintendente Xefe Polísia, Orlando Gomes, hateten kazu ne’e mosu iha área Ponte Comoro III entre feen ho laen tanba deskonfia malu.
“Horseik mosu tentativa omísidiu iha Ponte Comoro III. Kazu ne’e tanba suspeitu mak deskofia nia fen katak nia fen ne’e selingku fali ho mane seluk, tanba ne’e, halo suspeitu la satisfaas ho nune’e mak suspeitu taan nia fen nia oin. Agora daudaun supeitu ita halo ona detensaun ba nia iha oras 72 molok ita aprezenta ba Tribunál”, Orlando Gomes, hateten ba jornalista sira iha Ministériu Administrasaun Estatál, Caicoli, sábadu, ohin.
Vitíma agora halo hela tratamentu iha ospitál nasionál tanba kondisaun grave.
“Vitima sira VPU Munisípiu Dili asegura kedan hodi lori kedan ba ospitál hodi halo tratamentu. Vítima nia kondisaun hanesan ita bo’ot sira hanesan iha imajen ne’ebé públika nia hetan taa iha parte oin ne’ebé rezulta kanek grave no agora daudaun sei halao hela tratamentu iha ospitál”, nia konklui.
Jornalista:Natalino Costa
Editór : Zezito Silva

