DILI, 08 setembru 2024 (TATOLI)—Minisípiu Baucau aprezenta arku hanaran Uma-Boot iha dalan ninin iha área Comoro, iha ámbitu fó bem-vindu ba Papa Francisco, ne’ebé sei estadia iha Dili iha loron 09 to’o 11 setembru.
“Papa Francisco la to’o Baucau, maibé bainhira liuhusi arku ne’e, Baucau-oan sira sente dehan Amu Papa to’o Baucau, tanba símbolu ne’ebé lori iha arku ida-ne’e,” Prezidente Autoridade Munisípiu (PAM) Baucau, Veneranda Eurico Marques Lemos Martins, hateten, iha Comoro, domingu ne’e.
Munisípiu Baucau hetan orientasaun atu mai halo preparasaun ba arku ne’e iha loron 05 setembru, tanba ne’e ekipa ida husi Baucau lidera husi Xefe Lojístika mak mai halo preparativu ba arku espesiál ne’ebé hatudu identidade Baucau ninian.
“Potensialidade saida mak iha Baucau ne’e, ita sei aplika iha arku ne’e, entaun arku ne’e simboliza Baucau hanaran Uma-Boot Baucau. Ita Baucau-oan sira sente dehan Amu Papa to’o Baucau, tanba símbolu ne’ebé ita lori iha arku ida-ne’e, ne’ebé arku ne’e orsida kalan parese hotu ona, ita tau mós ita-nia uma-adat hanesan identidade Baucau ninian,” nia akresenta.
Notísia relevante : PM Xanana no membru Governu sira halo limpeza iha dalan protokolu
Autoridade Baucau rejista ona peregrinu hamutuk 13.702 husi Baucau sei partisipa iha misa solene iha Tasi-tolu.
“Ohin ne’e peregrinu 150 mak mai uluk tanba sira atu halo tebedai, orsida iha arku ninian ne’e forma hotu iha estrada ne’e halo tebedai,” PAM Baucau, haktuir.
Tuir observasaun husi Jornalista husi Agência Tatoli iha terrenu, nota katak arku munisípiu Baucau nian ne’e forma husi ponte CPLP to’o Eskuadra Polísia Ai-mutin.
Jornalista : Osória Marques
Editora : Julia Chatarina
