DILI, 09 setembru 2024 (TATOLI) – Komandu Polísia Nasionál Timor-Leste (PNTL) husi Munisípiu 14 autoriza membru 40 hodi reforsa ekipa konjunta forsa tarefa hodi apoia seguransa ba vizita Papa Francisco.
Membru PNTL hirak ne’e, akompaña sarani husi kada munisípiu idak idak mai Dili atu tuir misa iha Tasi-Tolu ne’ebé prezide husi Papa Francisco iha tersa (10/9).
Segundu Komandante PNTL Komsiáriu Jerál Polísia Pedro Belo prezide formatura jerál iha Sentru Forrmasaun Comoro (CFP, sigla portugés) hodi haree besik preparasaun ikus ba membru PNTL sira-nia ba seguransa vizita Sua Santidade Papa ne’ebé mak vizita Timor-Leste.
Pedro Belo, hateten Komandu PNTL halo formatura jerál ba preparasaun ikus ba membru PNTL atu asegura seguransa ba vizita Sua Santidade Papa Francisco.
“Ita-nia misaun importante mak ne’e, ita laos atu ba tuir misa maibé halo nusa asegura sarani sira hodi nune’e sira bele partisipa misa ho di’ak. Ita la’os ba ne’ebá atu hit liman ba Sua Santidade. Ita-nia funsaun mak atu hambrik iha estrada atu asegura sarani fó seguransa ba Amu Papa atu nune’e ema labele besik Amu Papa kecuali Amu Papa bolu atu ba duni, entaun ita ajuda nia lori para ba hasoru Amu Papa”, Pedro Belo iha nia intervensaun bainhira lidera formatura jerál ikus ba preparasaun membru PNTL sira ba vizita Amo Papa ne’ebé halo iha Sentru Formasaun Comoro.
Belo hateten, laiha ema ida atu muda nia hakarak atu ba hasoru Amu Papa bainhira laiha autorizasaun, ida-ne’e labele ba no seguransa labele autoriza.
“Tanba ne’e liuhusi formatura ne’e, ha’u husu ba membru sira atu haree ida-ne’e. Aban ba oin ne’e estraga ema nakonu ba ita bo’ot sira tenke haree ida ne’e. Ita-nia misaun importante ida mak ba atu asegura iha situasaun sira hanesan ne’e kuandu ita-nia sarani sira obriga aan ita bolu hodi koalia ba sira”, nia adianta.
Segundu Komandante PNTL, husu ba membru PNTL sira ne’ebé halao seguransa ba vizita Papa, tenke kolabora ho ekipa konjunta forsa tarefa hodi fó susesu ba vizita ne’e.
“Husu ba maluk sira, kuandu buat ruma akontese, imi husu autorizasaun hafoin hafoin hasai kilat, PNTL mantein no la tolera asaun demotrasaun iha ámbitu vizita Papa”, nia haktuir.
Jornalista:Natalino Costa
Editór : Zezito Silva
