DILI, 09 setembru 2024 (TATOLI) -Sua Santiade Papa Francisco realiza nia vizita mai Timor-Leste no iha loron Palásiu Prezidensiál ho karreta marka toyota sienta.
To’o iha Palásiu Prezidensiál Papa Francisco sa’e kareta ho marka toyota sienta ne’ebé prodús hosi nasaun Japaun kondutór husi Vatikanu. Maibé iha Aeroportu Internasionál Comoro Papa tun hosi Aviaun sa’e kedan kareta Jeep mutin ne’ebé iha leten mamuk. To’o Palásiu Prezidensiál iha tuku 18:07, Papa hatudu nia oin midar hamnasa hodi foti liman fó bensaun ba ema hirak be halibur aan hamutuk iha Palásiu Prezidensiál.
Nune’e, seguransa sira lori Papa Francisco tama liu ba varanda Palásiu Prezidensiál, Papa kontinente kedan Bandeira nasionál no Vatikanu nian, nune’e ekipa seguransa loke kedan ho marsa hosi FALINTIL-Forsa Defeza TimorLeste (F-FDTL) hodi hananu inu nasionál Timor-Leste no Vatikanu nian.
Hafoin ramata labarik kuaze 10-resin forma tara tais ba Amu Papa no hetan bensaun husi Sua Santidade no labarik hirak ne’e balun simu tersu husi Papa Francisco no labarik sira komprimenta bensaun husi Amu Papa.
Alende ne’e, Prezidente Repúblika José Ramos Horta mós hamrik ka’er liman komprimenta Amu Papa no dada lia kuaje minutu rua resin, nune’e Primeiru-Ministru Kay Rala Xanana Gusmão mós kaer liman komprimenta Papa hamutuk ho nia membru Governu sira balu.
Iha okaziaun ne’e, Bispu no Kardeal balu husi nasaun liur no Timor-Leste hakaat mós ba komprimenta Sua Santidade.
Bainhira ramata kaer lima, seguransa Vatikano tula Papa ba kareta roda akompaña husi Xefe Estadu, Xefe Governu ho nia membru sira lori Papa tama liu ba Palásiu laran.
Bainhira tama iha Palásiu Laran Papa realiza kedan enkontru bilaterál ho Xefe Estadu Ramos Horta durante minutu 30 nia laran.
Hafoin ne’e Papa sei realiza enkontru ho lider relijioza sira iha Timor-Leste no lider nasionál timor nian no Sosieade Sivíl sira iha Salaun Xina.
Tuir observasaun Tatoli nian haree, Papa tama ona iha resintu Palásiu Prezidensiál komunidade barak sei sae iha uma leten parte Aitarak Laran nian hodi hakilar viva Amu Papa no balun hakilar ho kontente.
Jornalista: Hortencio Sanchez
Editór:Florencio Miranda Ximenes
