Laiha kolen no hamlaha bainhira hetan Amu Papa

DILI, 09 setembru 2024 (TATOLI) – Defisiénsia Gabriel Araujo hein durante oras ualu nia-laran, hakarak haree Amu Papa nia oin no nia bensaun, la preokupa kolen no hamlaha.
“Ha’u mai desde tuku ualu dader hodi mai tur iha dalan diresaun Fatuhada nia atu mai simu Amu Papa no ha’u iha ne’e konta oras ualu no ohin ha’u konsege haree no simu duni bensaun husi Au Papa. Ha’u la sente kolen no hamlaha tanba ha’u hakarak atu hetan de’it Amu Papa nia oin no bensaun tanba ne’e mak desde ohin ha’u iha ne’e no mantein iha ne’e. Ida-ne’e orgullu ida ba ha’u hanesan sarani”, Gabriel Araujo hateten ba jornalista sira hafoin simu Papa Francisco, Fatuhada, segunda, ohin.
Araújo durante ne’e hola parte iha Asosiasaun Difisiénsia Timor-Leste (ADTL) no nia hela iha edifísiu ADTL Kintal Boot. Araujo nudar defisiénsia fízika iha ain, durante nia labele la’o maibé ho kadeira roda de’it, nia lao ho nia kadeira rona husi edifísiu ADTL Kintal Boot ba Fatuhada ho sapeu ida iha ulun no hatais faru ho imajen Papa nia no tur de’it iha loron manas laran hodi hein Amu Papa bainhira liu iha área Fatuhada.
Nia dehan, nudar ema sarani maske manas maibé kontente tanba simu ita-nia nain ulun kristaun nian.
“Nudar ema katóliku lahatene kolen, maibé ha’u sente kontente tanba Santo Padre bele mai sama iha ita-nia rai doben. Ha’u orgullu ho vizita ida-ne’e tanba hanesan sarani asiste direta”, nia adianta.
Nia afirma katak vizita ida-ne’e halo istória bo’ot ba Timor-Leste no tenke orgullu.
“Ha’u lakohi hela iha uma hodi haree husi televizaun de’it, ha’u hakarak mai direta iha ne’e hodi koopara uluk ita-nia aman mak konta dehan Amu Papa mós uluk mai halao nia vizita iha 1989 mas agora ita hotu partisipa iha vizita ne’e hanesan sarani maske loron manas, maibé ami sente hanesan malirin helan no hakarak haree Amu Papa”, nia konklui.
Jornalista: Natalino Costa
Editór : Zezito Silva

