DILI, 09 setembru 2024 (TATOLI)— Peregrinu 797 husi Nusa Tenggara Timur (NTT) Indonézia to’o ona iha fatin deskansa Eis Karantina COVID-19, Tasi-Tolu ne’ebé prepara husi Governu Timor-Leste ba Peregrinu sira antes partisipa misa hamutuk ho Papa Franciso iha Tasi-tolu loron 10 setembru 2024.
Bazeia ba relatóriu husi enkontru koordenasaun Dioseze Atambua no Arkidioseze Kupang, totál partisipante peregrinasaun husi Dioseze rua ne’e hamutuk na’in 947, ho detallu, ema na’in 385 husi Dioseze Kupang no ema na’in 562 husi Dioseze Atambua.
Maibé Sekretáriu Jerál Sentru Pastorál Dioseze Atambua, Yosef M. L. Hello ba Tatoli esplika numeru refere tun ba 797 tanbá iha peregrinu balun deside hodi halo voazen mesak mai Dili Timor-Leste no seluk kansela viazen ho razaun diferente.
“Númeru peregrinu tun tanba balun tama ona iha Timor-Leste, enkuantu númeru agora ne’e (797) mak ami ba rombongan (hamutuk) ho grupu. Razaun seluk, barak maka kansela tanba saúde, tauk ho cuaca ekstrim,” Yosef M. L. Hello dehan ba Tatoli via telefonika.
Sekretáriu Jerál Sentru Pastorál Dioseze Atambua ne’e haktuir, númeru peregrinu husi Atambua no Kupang inklui bispu, padre, madre no sarani katólika ho idade média 30 to’o 60 anos.
Antes ne’e Padre Vincentius Wun, SVD, reprezenta Dioseze Atambua liu husi komunikadu imprensa hateten númeru grupu peregrinu ne’ebé rejistadu husi Dioseze Atambua hamutuk ema na’in 596 no Arkidioseze Kupang hamutuk ema na’in 201 ne’ebé sei aranka ba Timor-Leste simultaneamente iha loron 9 fulan Setembru 2024.
“Hein katak vizita istóriku ne’e sei la’o ho di’ak no husu ba peregrinu sira atu prepara fuan ho hakmatek no ho hanoin ne’ebé di’ak atu nune’e bele kumpre nafatin regulamentu ne’ebé aplika iha nasaun rua ne’e,” Amu Vincentius Wun, SVD dehan.
Tuir observasaun Tatoli nian iha tereñu fatin deskansa ba peregrinu husi NTT hetan seguransa maximu husi Ekipa Tarefa Konjunta F-FDTL no PNTL no area refere proibidu ba ema seluk atu asesu inklui media hodi halo intrevista.
Jornalista : Cidalia Fátima
Editora : Armandina Moniz
