DILI, 09 setembru 2024 (TATOLI)—Peregrinu relijiaun Protestantizmu husi Assembleia de Deus, David Alves, konsidera Papa Francisco ninia prezensa mai Timor-Leste bele muda mentalidade sarani kristaun nian.
“Prezensa Sua Santidade Papa Francisco bele muda mentalidade kada ema nian, tanba dalaruma hanoin ne’ebé la hanesan tanba de’it diferente relijiaun. Tanba ne’e, ho prezensa Papa ne’e dada ita-nia hanoin sai ida de’it hodi lori dezentendementu ba futuru ne’ebé di’ak no prósperu,” David Alves hato’o ba Agência Tatoli, iha Comoro, segunda ne’e.
Notísia relevante : Sarani Motael nahe Tais simu Amu Papa Francisco
Nia dehan, maski relijiaun, rasa, kór, no kultura la hanesan, maibé fiar katak ho Papa nia prezensa bele hamutuk hodi lori país ne’e ba oin.
“Maibé ita presiza iha buat rua mak dahuluk ita tenke fiar no hakruuk ba Maromak depois Estadu, ida-ne’e importante nu’udar Kristaun Protestante hala’o iha moris loroloron nian,” nia akresenta.
David Alves nu’udar sidadaun timoroan sente onradu tanba Papa mai ne’e ba timoroan hotu.
“Ha’u nu’udar sidadaun timoroan ida no ha’u sarani protestante sente kontente bele mai simu Papa Francisco. Maski diferente relijiaun maibé atu dehan relijiaun ne’e fatin ne’ebé akumula ema, maibé ita-nia fiar hotu ba Maromak no dalan mak la hanesan,” nia tenik.
Peregrinu hamutuk 35 husi Assembleia de Deus mak ohin simu Papa Francisco iha dalan ninin.
Jornalista : Osória Marques
Editora : Julia Chatarina
