DILI, 10 setembru 2024 (TATOLI)— Peregrinu husi Parokia Naekeke Kefa, Nusa Tenggara Timur (NTT) Indonézia, Avo Hendrika Olin sente kontente bele haree direita Papa Francisco nia oin hafoin partisipa misa hamutuk iha Tasi-tolu, 10 setembru 2024.
“Kontente tanba bele hetan grasa, la triste tanba ohin ami hamriik besik lutu, hau hare’e nia oin maske la kaer liman,” dehan Avo Hendrika Olin ba Tatoli hafoin partisipa misa iha Tasi-tolu, tersa ne’e.
Avo Hendrika Olin esplika antes ne’e halao ona rejistu iha Parokia Naekeke nune’e iha loron 09 setembru 2024 hamutuk ho ekipa inklui Bispo Dioseze Atambua, Dominikus Saku halao viazen mai Dili.
Komunidade NTT ho idade 72 ne’e agradese bele halo viajen ho diak, no bele hetan fasilidade durante hela atu bele asiste misa hamutuk ida ne’e maske tenke halo viazen durante loron tomak husi Kefa mai Dili.
“Kolen tanba viajen dook, hau nia tinan 72 agora iha beioan sia, no oan neen, feto tolu no mane tolu, maibe nafatin kontente,” dehan Nia.
Antes ne’e Padre Vincentius Wun, SVD, reprezenta Dioseze Atambua liu husi komunikadu imprensa hateten númeru grupu peregrinu ne’ebé rejistadu hmautuk 797 ne’ebé husi Dioseze Atambua hamutuk ema na’in 596 no Arkidioseze Kupang hamutuk ema na’in 201 ne’ebé sei aranka ba Timor-Leste simultaneamente iha loron 9 fulan Setembru 2024.
Durante iha Dili, peregrinu husi NTT hela iha Eis Karantina COVID-19 no hetan fasilidade sira hanesan kuartu ba kada peregrinu ho kulsaun, haris fatin, toilet no hetan seguransa maximu husi Ekipa Tarefa Konjunta F-FDTL no PNTL área refere proibidu ba ema seluk bainhira laiha lisensa.
Jornalista : Cidalia Fátima
Editora : Armandina Moniz
