DILI, 11 setembru 2024 (TATOLI)— Peregrinu husi NTT (Nusa Tenggara Timur) Indonézia ohin loron husik hikas Timor-Leste hafoin partisipa misa ne’ebé prezide husi Sua Santidade Papa Francisco iha Tasi-tolu Dili, 10 setembru 2024.
Durante iha Dili, Governu no Igreja Katólika Timor-Leste servisu hamutuk ho Embaixada Republika Indonézia hili ona Eis Karantina COVID-19 hodi prepara fasilita peregrinu sira husi NTT liu-liu ba dioseze rua Kupang no Atambua ne’ebé hola parte ba fronteira entre nasaun rua nian iha illa Timor.
Sekretáriu Jerál Sentru Pastorál Dioseze Atambua, Yosef M. L. Hello hato’o nia agradese ba Komisaun Nivel Altu ba Vizita Sua Santidade Papa Francisco tanba bele hetan atendimenttu espesial to’o husik hela Dili dader ne’e.
“Konfortavel tebes. Ami hakarak hato’o ami nia agradesimentu wain. Ami hetan atensaun no atendementu espesiál, ida ne’e extraordináriu,” Sekretáriu Jerál Sentru Pastorál Dioseze Atambua dehan ba Tatoli via telefónika.
Yosef M. L. Hello espera nasaun Indonézia no Timor-Leste nafatin metin liu tan hanesan maun alin liu-liu ba sarani kristaun Katólika sira. “Hein katak nasaun Timor-Leste sai avansadu liu tan no maun-alin ho Indonézia liu-liu Dioseze Atambua sei avansadu liu tan,” nia hateten.
Nune’e mós Padre Urbanus Bungga Lolon husi NTT no agora hola knaar hanesan Pároku Balibo Bobonaro hatete sentidu vizita Papa nian ba peregrinu sira husi NTT mak hanesan grasa ida bele hare’e direta lidér Katólika nian ne’ebé dook deit iha Vatikan.
“Sentidu ba sira mak bainhira bele tuir misa hamutuk ho Papa tanbá durante ne’e Papa dook iha Vatikan no iha parte seluk ne’e grasa boot ida, no iha intensaun espesial no iha sira nia fuan laran bele hato’o saida mak sira hakarak. Punya kebanggaan tersendiri bele mai direita hare’e Papa,” Padre Urbanus dehan ba Tatoli.
Nia espera ho vizita ida ne’e ba ema hotu liu-liu timor-oan tomak atu hanoin fila fali mudansa saida mak sei halo hafoin Papa husik hela Timor-Leste hanesan uluk 1989, tantu iha politika, spiritual, ekonomia no kultura, nune’e buat hotu bele diak liu tan.
Antes ne’e Padre Vincentius Wun, SVD, reprezenta Dioseze Atambua liu husi komunikadu imprensa hateten númeru grupu peregrinu ne’ebé rejistadu hamutuk 797 ne’ebé husi Dioseze Atambua hamutuk ema na’in 596 no Arkidioseze Kupang hamutuk ema na’in 201 ne’ebé aranka ba Timor-Leste simultaneamente iha loron 09 fulan setembru 2024.
Durante iha Dili, peregrinu husi NTT hela iha Eis Karantina COVID-19 no hetan fasilidade sira hanesan kuartu ba kada peregriñu ho kulsaun, haris fatin, toilet no hetan seguransa maximu husi Ekipa Tarefa Konjunta F-FDTL no PNTL área refere proibidu ba ema seluk bainhira laiha lisensa.
Jornalista : Cidalia Fátima
Editora : Armandina Moniz
