DILI, 10 setembru 2024 (TATOLI)—Líder másimu Igreja Katólika iha mundu, Papa Francisco, tersa ne’e, halo enkontru ho bispu, sarsedote, diákonu, kongsagradu/a, seminarista inklui katekista sira hamutuk 2.000, ne’ebé hafoin sesaun ne’e Amu Papa fó bensa ba ema moras hamutuk 100.
Programa iha Katedral ne’e la’o durante maizumenus oras ida nia laran,nune’e Amu Pároku entega crúz no bee abensoada ba aspersaun.
Hafoin ne’e, Amu Papa halo bensaun ba relijozu sira no hetan komprimenta husi Bispu Dom Virgílio Kardeál do Carmo da Silva, Dom Norberto do Amaral, Dom Leandro Maria Alves no seluk tan.
Liu tiha ida-ne’e, protokolu lori kedas karreta roda ba Papa tuur no tun husi alatar fó bensa ba madre sira ne’ebé hein no ikus sai mai fó bensa ba ema moras 100 ne’ebé halibur iha resintu Igreja Katedrál, husi númeru ne’e Papa fó bensa uluk ba feto ida ho tinan 27 ne’ebé moras durante ne’e toba de’it iha kama leten.
Notísia relevante : Konfisaun relijiozu prenxe ona Igreja Katedral husi tuku 04:00 dadeer
Ema moras sira ne’e maioria hanesan ferik no katuas hafoin sira simu bensaun direita husi Papa, sira hatudu oin kontente no balun hamonu matan-been.
Aleinde ne’e, Papa Francisco mó fó bensa ba defisiénsia sira mai husi Asosiasaun Defisiénsia Timor-Leste.
Amu Papa fó bensa mós ba plaka lima ne’ebé tolu reprezenta Dioseze Dili no rua husi Universidade Katólika Timor-Leste (UCT) nian.
Hafoin ne’e, Amu Papa sei desloka fali bá Nunsiatura Apostólika Faról hodi deskansa, hafoin iha tuku 16:30 sei prezide misa solene iha Tasi-tolu.
Jornalista : Arminda Fonseca
Editora : Julia Chatarina
