DILI, 12 setembru 2024 (TATOLI) – Ministru Interiór(MI), Francisco Guterres fó apresiasaun ba servisu membru Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL), ne’ebé hola parte iha ekipa konjunta forsa tarefa, iha ne’ebé fó seguransa di’ak tebes durante vizita Amu Papa iha 9 to’o 11 setembru 2024.
“Agradese tebes sira bele halo servisu di’ak no husu mantein servisu ba oin. Ne’e hatudu katak sira komesa halao servisu di’ak no profisionál”, Francisco Guterres hateten ba jornalista sira hafoin partisipa iha enkontru Konsellu Ministru Estraordinaria iha Palásiu Governu, kinta, ohin.
Nia husu ba membru PNTL no F-FDTL atu mantein hatudu servisu di’ak no profisionál hodi fó seguransa ba povu no nasaun di’ak liután iha futuru.
“Servisu nafatin profisionál, servisu nafatin atu hodi harii ita-nia nasaun povu, saida mak ita bo’ot sira hatudu hanesan ida foin lalais ne’e kapas tebes, parabéns ba ami”, afirma.
Governante ne’e agradese mós ba povu, joven sira ne’ebé apoia másimu autoridade seguransa liuhusi hatudu komportamentu ne’ebé di’ak tebes hodi fó susesu durante loron tolu vizita Sua Santidade Papa iha Timor-Leste.
“Aproveita mós hakarak hato’o ba joven sira, ba komunidade sira tomak, parabéns ba sira. Agradese tebes ba sira tanba sira-nia komportamentu durante Amu Papa nia vizita ne’e furak tebes tanba ne’e agradese. Obrigadu ba sira-nia komportamentu komunidade ho juventude ba sira”, nia kongratula.
Iha fatin diferente, Komandante Komandu (PNTL) Munisípiu Dili Superintendente Xefe Orlando Gomes, apresia ba públiku tomak tanba durante vizita Sua Santidade Papa Francisco iha Timor-Leste, situasaun seguransa la’o iha ámbitu hakmatek nia-laran.
“Hakarak atualiza situasaun durante vizita Sua Santidade Papa mai iha Timor-Leste iha kapital Dili. Situasaun seguransa la’o di’ak tebes no Forsa Tarefa kompostu husi PNTL no F-FDTL hamutuk ho seguransa volontáriu sira halo seguransa ne’ebé di’ak tebes to’o ita-nia Sua Santidade fila mós ita-nia situasaun la’o di’ak, buat hotu lao di’ak”, Orlando Gomes hateten ba jornalista sira iha nia kna’ar Komandu PNTL munisipiu Dili Caicoli, kinta ohin.
Komandante ne’e subliña, vizita Sua Santidade Papa iha Dili, PNTL rejista kazu asidente trafegu lima, kompostu husi motór soke malu maibé ho kondisaun di’ak vítima sira ladún grave no iha mós kazu violasaun doméstika haat tanba ho komunidade nia atuaziasmu hakarak haree no simu bensaun husi Amu Papa.
Iha mós dezentendimentu iha dalan públiku no rezulta vítima rua mak hetan kanek ho nune’e polísia lori kedan ba Hospitál Nasional Guido Valadares hodi halo tratamentu to’o ikus sira koopera hodi simu malu, maibé prosesu ba sira polísia kontinua halo tanba konsidera hanesan kazu ona.
Jornalista: Natalino Costa
Editór : Zezito Silva
