DILI, 13 setembru 2024 (TATOLI)—Operadór telekomunikasaun Telkomcel sente orgullu tanba bele hola parte iha preparasaun ba Papa Francisco nia vizita mai Timor-Leste.
“Ami sente onradu tebes bele kontribui ba eventu monumentál Papa Francisco nia vizita ida-ne’e, la’ós de’it momentu reflesaun nian maibé mós selebrasaun unidade no reziliénsia iha Telkomcel. Ami fiar impaktu sosiál iha asaun hotu ne’ebé ami halo. Haree Amu Papa Francisco halibur no harii ligasaun espirituál ho komunidade fó hanoin mai ita hotu kona-ba ita-nia objetivu,” CEO Telkomcel, Benedictus Ardi Priyo, hateten liuhusi nota ne’ebé Agência Tatoli asesu, sesta ne’e.
Telkomcel iha ninia kompromisu metin atu fó apoiu ba komunidade, ho orgullu fó sai ninia envolvimentu iha preparasaun Papa Francisco nia vizita mai Timor-Leste, ne’ebé hanesan vizita ne’ebé hafoin tinan-35 desde Papa João Paulo II mai iha Timor-Leste iha tinan 1989 halo momentu istóriku ida.
Nu’udar nasaun ida ne’ebé maioria katóliku, Papa Francisco nia prezensa mai la’ós de’it akontesimentu importante ida, maibé mós hanesan momentu istóriku ida ba komunidade katólika mundiál tuir lema ‘Ita-nia fiar sai ita-nia kultura.’
Lema ofisiál husi vizita ne’e hanesan xamada no enkorajamentu ida atu sarani bele moris fiar iha armonia ho kultura, tuir tradisaun povu timoroan nian.
Notísia relevante : MTK no Telkomcel alarga konetividade to’o postu administrativu
Vizita Papa ne’e ho objetivu atu promove dame, unidade no reflesaun espirituál, hametin Timor-Leste nia lasu kulturál no espirituál ho komunidade katólika sira iha mundu tomak.
“Papel Telkomcel nian hodi apoia vizita sira nu’udar empreza telekomunikasaun prinsipál iha Timor-Leste, Telkomcel komprometidu katak atu garante konetividade ne’ebé la’o ho di’ak durante eventu istóriku ne’e. Kompromisu ne’e la’ós de’it inklui prestasaun servisu, maibé mós reflete ba dedikasaun atu fó impaktu pozitivu iha komunidade,” Benedictus Ardi, akresenta.
Liuhusi inisiativa impaktu sosial, Telkomcel bele envolve ativu iha projetu oin-oin ne’ebé konsentradu iha komunidade, hodi fó impaktu loloos ba sosiedade.
“Esforsu sira-ne’e hatudu katak Telkomcel nia objetivu sira la’ós de’it fornese konetividade ida-ne’e reflete ami-nia dedikasaun atu halo diferensa signifikativu iha komunidade,” nia afirma.
Telkomcel aumenta nia apoiu fó asisténsia téknika iha terrenu, habelar kobertura rede, no oferese WiFi gratuita iha fatin xave sira durante Papa Francisco nia vizita.
Aleinde ne’e, Telkomcel fasilita kanál komunikasaun no transporte ba reprezentante mídia ofisiál sira hodi garante kobertura ba eventu istóriku ne’e la’o ho di’ak no efetivu.
Telkomcel mós fó apoiu ba Komisaun Nasionál Juventude Katólika Timor-Leste no Konferénsia Episkopál Timorense durante Papa Francisco nia vizita.
Atu atende vizitante sira-nia nesesidade durante vizita, Telkomcel estabelese ona sentru atendimentu ba kliente tolu iha fatin importante sira hanesan Basecamp Atauro-Oecusse Tibar, Basecamp ba pereginante sira husi NTT iha Tasi-tolu), no Otél Hilton.
Sentru sira-ne’e tau iha fatin estratéjiku atu fornese asesu fásil ba Telkomcel nia servisu ba vizitante, mídia no kliente sira, ne’ebé reflete empreza nia dedikasaun hodi fornese apoiu no konetividade esepsionál, 3.000 SIM Cards (ho pakote internet ) ba foin-sa’e 3.000 iha eventu iha Sentru Konvensaun Dili (CCD, sigla portugés). Kartaun SIM ne’e fornese SMS gratuita, xamada no asesu ba internet durante eventu la’o.
Juventude sira husi munisípiu oin-oin iha Timor-Leste mós simu kartaun SIM gratuita hodi garante katak sira iha asesu fásil ba konetividade no bele envolve totalmente iha eventu istóriku ida-ne’e.
Kartaun SIM 100 ba mídia akreditadu
Telkomcel mós habelar ninia apoiu ba mídia akreditadu husi Vatikanu hodi fornese kartaun SIM espesiál 100 ba mídia akreditadu husi internasionál hodi asesu ba banda larga móvel, Telkomcel hetan konfiansa atu hala’o transmisaun diretu no transmisaun ofisiál sira husi mídia, ne’ebé konfirma kompromisu Telkomcel hodi garante kobertura ne’ebé la’o ho di’ak.
“Ita-nia apoiu inklui mobilizasaun ba Papa Francisco nia tripulasaun no parseiru mídia ofisiál sira hotu hodi garante kobertura efetivu no labele initerrompe ba eventu istóriku ida-ne’e. Telkomcel hatudu katak iha kapasidade atu fornese konetividade ne’ebé la interompe durante eventu ida-ne’e,” CEO Telkocel, relata.
Hasa’e kapasidade móvel no habelar asesu WIFI gratuitu hodi apoiu Papa Francisco nia vizita, Telkomcel halo melloramentu signifikante hodi apoia Amu Papa Francisco nia vizita ba Kongregasaun Madre Alma, Katedrál, no Sentru Mídia Kreda nian, Nunsiatura Apostólika iha Farol, Misa Santa iha Tasi-tolu, no enkontru juventude iha CCD.
Antisipa vizitante liu 700.000, Telkomcel habelar ona nia rede hodi harii infraestrutura B2S foun 9, estasaun iMacro 11, massive-mimo 2, no koloka hotspot WiFi ho velosidade a’as gratuita 26 iha fatin importante sira.
Iha mós asesu internet gratuita durante eventu sira iha Kongregasaun Madre Alma no Katedrál. Aprosimasaun proativa ida-ne’e atu garante kada momentu husi eventu ida-ne’e bele iha ligasaun, la’o ho di’ak, no bele fahe husi ema hotu, hodi subliña kompromisu Telkomcel atu hasa’e esperiénsia komunidade durante momentu istóriku ida ne’e.
Tasi-tolu sai POI
Tasi-tolu sai hanesan hanesan Point of Interconnection (POI) ne’ebé produtivu liu ho aumentu iha karga útil +190,13%, aumentu iha tráfiku lian +189,76%, no aumentu iha utilizadór ligadu +177,77%.
Númeru kliente POI nian mós aumenta +189,95% (inklui utilizadór doméstiku no roaming sira). Jeralmente, iha aumentu ida iha POI hotu-hotu, ho karga ne’ebé aumenta +111,13%, tráfiku lian nian +113.38%, no subskritór sira +12,64%
Apoiu liña internet seguru no kolabora ho instituisaun Estadu
Atu garante konektividade konfiável, Telkomcel konsege asegura apoiu rede internet liuhusi kolaborasaun di’ak ho instituisaun Ministériu Transporte no Komunikasaun (MTK), Autoridade Nasionál Komunikasaun (ANC, sigla portugés) no TIC Timor, I.P. Parseria ida-ne’e destaka konfiansa ne’ebé tau iha Telkomcel nia kapasidade sira ne’ebé prova ona no ninia reputasaun sólidu nu’udar parseiru estratéjiku.
Apoiu ne’e refleta Telkomcel nia dedikasaun hodi presta servisu esepsionál no fó prioridade ba unidade ho vizita Papa Francisco nian.
Live Streaming husi Papa Francisco nia vizita ho myTelkomcel, ho apoiu husi Governu Timor-Leste, Telkomcel hetan konfiansa nu’udar fornesidór prinsipál ba banda larga, ne’ebé fornese streaming direta ho kualidade a’as durante Papa Francisco nia vizita liuhusi myTelkomcel.
Aplikasaun móvel ida-ne’e komprensivu no fásil atu uza hasa’e Telkomcel nia servisu sira, fornese solusaun kompletu ida ba jestaun servisu sira no garante katak audiénsia sira ligadu nafatin durante eventu tomak.
Kona-ba Telkomcel
Telkomcel, koñesidu mós ho naran Telin Timor-Leste, hanesan fornesedór telekomunikasaun prinsipál ida iha Timor-Leste, ne’ebé dedika ba fornese konetividade no solusaun dijitál ba indivíduu no empreza sira iha nasaun laran tomak.
Telkomcel komprometidu atu fó impaktu sosiál signifikativu liuhusi inisiativa impaktu sosiál, ne’ebé subliña ninia dedikasaun hodi hadi’a bem-estar komunidade timoroan nian. Liuhusi ponte konetividade no enkoraja envolvimentu komunidade nian, Telkomcel kontinua hametin ninia knaar nu’udar parseiru vitál iha dezenvolvimentu no kreximentu Timor-Leste nian.
Jornalista : Arminda Fonseca
Editora : Julia Chatarina
