DILI, 17 setembru 2024 (TATOLI)–Embaixadór Repúblika Árabi Saaraui, Boibat Malainin Boibuat, kongratula Primeiru-Ministru (PM), Kay Rala Xanana Gusmão kona-ba Timor-Leste nia susesu hodi simu Papa Francisco no Sekretáriu-Jerál (SekJer) Organizasaun Nasaun Unida (ONU), António Guterres.
“Ha’u kongratula nia tanba susesu husi eventu boot sira ne’ebé foin lalais akontese iha Timor-Leste. Vizita husi Papa Francisco, aniversáriu ba dala-25 husi referendu kona-ba determinasaun rasik-an. Liuhusi ida-ne’e, Timor-Leste hetan ninia independénsia. Vizita Sekretariu-Jerál ONU nian, vizita Prezidente Republika Demokrátika Arab Saaraui (Brami Ghali), no konvidadu sira seluk,” Embaixadór Boibat hateten iha Palásiu Governu, tersa ne’e.
Tuir nia, susesu husi eventu ne’e tanba parte hotu nia kontribuisaun simu konvidadu sira ne’ebé mai husi rai-li’ur.
Aleinde ne’e mós ko’alia ho Primeiru-Ministru kona-ba kestaun bilaterál sira ne’ebé iha interrese ba malu, liu-liu kona-ba dezenvolvimentu sira iha luta Sahara Osidentál nian ba determinasaun ukun rasik an.
“Ha’u mós fó hatene nia kona-ba dezenvolvimentu foun sira iha luta Sahara Osidentál nian ba determinasaun ukun rasik-an, independénsia no soberania tomak Repúblika Sahara.” nia akresenta.
Notísia relevante : Xefe Estadu Repúblika Demokrátika Arabe Sarauí felisita TL ne’ebé komemora loron Konsulta Populár
Iha okaziaun aseitasaun Timor-Leste nian nu’udar membru ONU nian, Kay Rala Xanana Gusmão nu’udar Prezidente iha tempu ne’ebá, husu atu replikasaun ba implementasaun planu ONU nian atu hala’o referendu kona-ba determinasaun an rasik iha Saaraui Osidentál.
Iha nia apelu, Xanana hateten: “Ho votasaun demokrátiku, justu no livre, hanesan akontese iha Timor-Leste, situasaun ne’ebé la justu bele remata.”
Iha fulan-abríl liubá, Timor-Leste aprova ona projetu rezolusaun Governu nian ida atu fó kontribuisaun hamutuk $60.000 ba Reprezentasaun Permanente Republika Demokrátika Árabi Saaraui iha Timor-Leste.
Kontribuisaun ne’e sai nu’udar prinsípiu solidariedade nian ba luta povu nian ba libertasaun nasionál no direitu ba autodeterminasaun no independénsia, ne’ebé hakerek iha Konstituisaun Republika, iha rezolusaun Parlamentu Nasionál kona-ba solidariedade no apoiu ba povu Saaraui .
Timor-Leste rasik kontribui ona dezde tinan-2011, ba funsionamentu Reprezentasaun Permanente iha Dili, liuhusi fornesimentu subsídiu anuál ida ba implementasaun ninia atividade sira iha Timor-Leste no iha rejiaun.
Jornalista : Osória Marques
Editora : Julia Chatarina
