Xefe Estadu Repúblika Demokrátika Arabe Sarauí felisita TL ne’ebé komemora loron Konsulta Populár
DILI, 30 agostu 2024 (TATOLI) – Prezidente Repúblika Demokrátika Árabe Sarauí, Brahim Ghali, felisita Povu Timor-Leste ho nia líder sira ne’ebé komemora aniversáriu loron Konsulta Populár ba dala-25 (30 Agostu 1999 – 30 Agostu 2024).
Brahim Ghali hato’o felisitasaun ne’e durante hasoru-malu ho Primeiru-Ministru (PM), Xanana Gusmão iha Palásiu Governu, sesta ne’e.
“Hakarak solisita Primeiru-Ministru, Kay Rala Xanana Gusmão ho Prezidente Repúblika no povu Timor-Leste ne’ebé selebra aniversáriu konsulta populár ba dala-25. Ho referendu ne’e hatudu Timor-Leste independente totalmente. Timor-Leste no Sarauí nu’udár amigu di’ak,” Xefe Estadu ne’e felisita.
Durante enkontru ho Primeiru-Ministru ko’alia kona-ba situasaun nasionál no internasionál inklui kooperasaun bilaterál entre nasaun rua.
Relasaun bilaterál entre Timor-Leste ho Repúblika Demokrátika Árabe Sarauí estabelesidu desde kedan Timor-Leste hetan ninia independénsia.
Iha okaziaun Timor-Leste hetan aseitasaun hanesan membru Nasaun Unida nian, Kay Rala Xanana Gusmão nu’udár Prezidente iha tempu ne’ebá, apela ba replikasaun husi implementasaun planu ONU nian ba referendu ida kona-ba autodeterminasaun ba Sarauí Osidentál.
Apelu ne’e Xanana dehan katak, “Ho votasaun ida ne’ebé demokrátika, justa no livre, hanesan ho ida ne’ebé hala’o iha Timor-Leste mak bele hakotu situasaun la justu.
Jornalista: Hortencio Sanchez
Editor: Florencio Miranda Ximenes
