Top

Ofisiál Justisa foun na’in-sia simu pose

Juiza Administradora Tribunál Judisiál Primeira Instánsia Dili, Edite Palmira dos Reis. Imajen dok Tatoli

DILI, 17 setembru 2024 (TATOLI) – Tribunál Judisiál Primeira Instánsia Dili (TJPID), fó pose ba ofisiál justisa na’in-sia no promove mós ofisiál adjuntu eskrivaun ba juiz hamutuk 11.

Ofisiál Jusitsa sira no adjuntu eskrivaun hirak ne’e sei koloka ba Tribunál Judisiál Primeira Instánsia Dili, Baucau, Covalima (Suai) no Oe-Cusse.

Pose ba Ofisiál Jusitsa na’in-sia no adjuntu eskrivaun 11, bazeia ba estatutu tuir Dekretu-Lei N.º 19 /2012. 25 abríl, kona-ba ofisiál justisa sira-nia estatutu.

Juiza Admistradora TJPID, Edite Palmira, hateten serimónia pose ofisiál justisa na’in sia, iha mós ofisiál adjuntu eskrivaun ba Juiz sira hanesan promosaun karreira.

“Ohin ne’e ita fó pose ba ofisiál justisa foun na’in sia no ita mós fó pose ba ofisiál justisa tuan sira ne’ebé promove ba adjuntu eskrivaun Juiz sira ne’ebé iha ba Tribunál Judisiál Primeira Instánsia Dili, Baucau, Suai no Oe-Cusse hamutuk ema na’in 11. Sira ne’e sei akompaña Juiz sira bainhira prezide julgamentu iha Tribunál Judisiál Primeira Instánsia sira ne’ebé ita iha ne’e”, Edite Palmira, hateten ba jornalista sira iha TJPID, tersa, ohin.

Edite hateten, adjuntu eskrivasaun sira ne’e nia servisu mak atu halo koordenasaun ho departamentu seksaun sivil no krime iha TJPID sira bainhira iha prosesu ida, sira mak anota.

“Husu ba adjuntu eskrivaun no ofisiál justisa foun sira, atu hala’o servisu ne’ebé ho étika profissionál, husu atu respeita sira ninia xefe iha seksaun  sira, atu nune’e bele dirije sira hodi halo servisu ne‘ebé efisiénsia no efikasia iha sistema judisiária”, nia afirma.

Iha fatin hanesan, ofisiál justisa foun Alipio Manuel Paulo Monis Souza, sente kontente no agrades tanba halo kompromisu onra atu sai nu’udar servidór ba mákina Estadu, espesialmente kontribui iha Tribunál.

“Kontente no agradese ba apoiu sira hotu durante ne’e, kontribui ba susesu ohin loron, ami na’in-sia ne’ebé simu. Ami estajiu durante tinan ida hanesan ofisiál justisa estajiária desde tinan kotuk molok hetan pose ba ofisiál justisa, dala ida tan ha’u agradese”, nia dehan.

Iha fatin hanesan, Ofisiál Adjuntu Eskrivaun Norberto da Costa Boavida, sente kontente no orgulliu tanba formasaun kona-ba adjuntu eskrivaun ne’e foin primeira vez  halao iha Tribunál.

Jornalista: Natalino Costa

Editór : Zezito Silva

 

 

Publisidade

Leave a Reply

Latest Post

error: Content is protected !!