Top

TJPID muda ona Juiz atende julgamentu ba kazu krime no sivil

Juiza Administradora Tribunál Judisiál Primeira Instánsia Dili (TJPID), Edite Palmira. Imajen TATOLI/ Natalino Costa

DILI, 19 setembru 2024 (TATOLI) – Juiza Administradora Tribunál Judisiál Primeira Instánsia Dili (TJPID), Edite Palmira, dehan Tribunál Dili halo ona mudansa ba Juiz sira hodi atende ba julgamentu ba kazu krime no sivil.

Nia rekorda, prosesu krime ne’ebé antes ne’e atende husi Juiz koletivu na’in-tolu, Tribunál Dili halo ona mudansa hodi aumenta tán Juiz na’in-ida, entaun ba kazu krime agora ne’e Juiz koletivu ne’e iha na’in haat ona, laos na’in-tolu. Enkuantu ba kazu sivil ne’ebé antes ne’e prezide husi Juiz koletivu na’in-tolu hela de’it na’in rua.

“Depoizde ferias judisiáriu tama fali mai, ita halo mudansa uitoan. Iha Juiz na’in-rua ne’ebé antes kaer kazu sivil muda ona mai hodi kaer prosesu krime. Tanba ne’e julgamentu ba prosesu krime ne’ebé uluk priénse husi Juiz koletivu na’in-tolu maibé ho mudansa ne’ebé iha agora ne’e,  ba prosesu krime ne’e priénse husi Juiz koletivu na’in-haat. Enkuantu ba prosesu sivil ne’ebé antes ne’e priénse husi koletivu na’in-tolu, agora hela de’it ona na’in-rua”, Edite Palmira hateten ba jornalista sira iha nia kna’ar fatin Tribunál Judisiál Primeira Instánsia Dili Mandarin, kinta, ohin.

Nia dehan, Juiz sira ne’ebé ka’er prosesu krime kolokadu iha Tribunál Judisiál Primeiru Instánsia Dili hamutuk 12 no ba Juiz sira ne’ebé ka’er prosesu sivil iha ema na’in haat de’it.

“Juiz sira ne’ebé agora ka’er prosesu krime iha 12. Ba prosesu sivil agora iha Juiz na’in haat de’it mak troka malu kaer kazu sivil”, nia salienta.

Edite hateten, iha Juiz na’in-tolu mak husi Tribunál Judisiál Primeira Instánsia Baucau mak muda mai iha Tribunál Dili, nune’e mós Juiz na’in-rua husi Tribunál Dili muda fali ba Tribunál Baucau.

“Agora daudaun Juiz sira ne’ebé koloka iha Tribunál Judisiál Primeira Instánsia Dili iha 16 ona. Númeru Juiz sira agora iha Tribunál Dili la sufisiente atu atende prosesu sira. Tanba prosesu ba krime de’it barak tebes, iha 2.500. Ha’u lahatene sé aban bain-rua, ita haree took tinan oin ne’e iha redusaun ka mantein nafatin tanba prosesu ne’e tama nafatin ka lae, tanba ne’e tinan oin ita haree, se lakonsege, presiza iha fali Juiz foun sira”, nia informa.

Nia dehan, kandidatu Juiz 13 ne’ebé konklui ona sira-nia kursu Juiz nian, sé sira mak tama mai pelumenus iha prosesu singulár no koletivu sira ne’e bele ajuda para prosesu ki’ik koan lalika fó ba Juiz sira antigu atu haree.

“Maibé iha dekretu-lei foun, Governu haruka sira 13 ne’e ba tuir tán formasaun tinan ida iha Portugal”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!