Top

Tribunál Dili retoma julgamentu hafoin ferias judisiária

Juiza Administradora Tribunál Judisiál Primeira Instánsia Dili, Edite Palmira dos Reis. Imajen dok Tatoli

DILI, 19 setembru 2024 (TATOLI) – Juiza Administradora Tribunál Judisiál Primeira Instánsia Dili (TJPID), Edite Palmira, dehan Tribunál Judisiál Primeira Instánsia Dili retoma hikas ona funsaun normál hafoin ferias judisiária durante fulan ida-resin.

“Ita bo’ot sira hatene durante ne’e ita la halo julgamentu normál, tanba Tribunál iha ferias judisiária. Komesa iha segunda foin daudaun ne’e Tribunál retoma hikas ona funsaun normál hodi atende kazu julgamentu sira”, Edite Palmira hateten ba jornalista sira iha nia kna’ar fatin Tribunál Judisiál Primeira Instánsia Dili Mandarin, kinta, ohin.

Nia dehan, Tribunál retoma funsaun iha loron 16 setembru 2024, kontinua kedan halo julgamentu ba kazu krime 30 no kazu sivil 10.

Juiza Edita subliña, tuir planu katak hafoin ferias judisiária sei utiliza edifísiu Tribunál ne’ebé lokaliza iha Caicoli ba julgamentu. Maibé edifísiu foun ne’e seidauk bele utiliza tanba empreza seidauk kompeta buat balun.

“Ami-nia fasilidade sira iha ne’e mós seidauk muda ba edifísiu foun. Ita bo’ot sira haree dokumentu arkivu sira mak ita-nia funsionáriu sira lori ba tau iha edifísiu foun. Enkuantu ba julgamentu, ita seidauk bele hala’o iha edifísiu foun tanba empreza seidauk kompleta hanesan letra balun seidauk no instalasaun ba sistema mós seidauk”, nia afirma.

Nia dehan, empreza halo hela esforsu atu kompleta buat sira ne’e molok muda fasilidade sira ba edifísiu foun.

“Edifísiu foun Tribunál Dili hein halo inagurasaun de’it ona, maibé iha buat ki’ik balun mak presiza atu kompleta mak letra sira ne’ebé balun seidauk kompletu, instalasaun ba sistema sira mak seidauk, kuandu hotu ona ita inagura no ita uza kedas”, nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!