Tribunál Movél ba munisípiu haat mantein funsiona
DILI, 19 setembru 2024 (TATOLI) – Juiza Administradora Tribunál Judisiál Primeira Instánsia Dili (TJPID), Edite Palmira, hateten Tribunál Movél ba munisípiu Aileu, Dili, Liquiça no Ermera kontinua funsiona ho objetivu atu hakbesik justisa ba povu liuhusi julgamentu movel.
“Munisípiu haat ne’ebé mak sai hanesan área juridisaun ba Tribunál Judisiál Primeira Instánsia Dili mak hanesan Dili rasik Aileu, Liquiça no Ermera, julgamentu movél ba munisípiu sira ne’e kontinua funsiona”, Edite Palmira dehan ba jornalista sira iha nia kna’ar fatin Tribunál Judisiál Primeira Instánsia Dili Mandarin, kinta, ohin.
Nia dehan, Juiz sira halo julgamentu movél to’o área rurál maibé presiza seguransa.
“Julgamentu movél presiza seguransa, entaun baibain julgamentu movél ami utiliza eskuadra polisiál de’it. Foin daudaun iha Liquiça ba kedan iha área Bazartete nia leten ami ba to’o iha ne’ebá”, nia adianta.
Tribunál Movél ne’e nia objetivu mak atu lori justisa besik liu povu sira iha área rural, liuliu ba ferik, katuas no inan isin rua sira ne’ebé labele asesu julgamentu to’o munisípiu nian ho razaun kustu selu transporte no dala ruma lao dook.
“Entaun Tribunál iha karreta, ita bele fasilita Juiz sira bele halo julgamentu to’o área rurál”, nia afirma.
Edite adianta, iha fulan-Outubru, Tribunál Judisiál Primeira Instánsia Dili sei halo julgamentu movél ba prosesu balun.
“Antes ferias judisiariu, ita hato’o ona pedidu ba Konsellu Superiór Majistratura Judisiáriu atu aprova hodi halo julgamentu movél. Tanba tuir prosesu ne’e, antes fulan ida atu realiza julgamentu movél, tenke hatama pedidu ba konsellu para halo aprovasaun. Konsellu aprova ona no outubru, ita sei halo julgamentu movél ba prosesu balun ne’ebé ita prepara ona”, nia esplika.
Jornalista: Natalino Costa
Editór : Zezito Silva
