Top

Alkatiri no Arsenio keixa Lobato ba Ministériu Públiku

Antigu Prezidente Autoridade Rejiaun Administrativa Espesiál Oé-Cusse Ambeno (RAEOA), Marí Alkatiri, kumpre notifikasaun husi Tribunál Primeira Instansia Oé-Cusse, katak iha loron 10 nia laran, tenki hasai sasán privada no hamamuk rezidénsia Fulolo. Imajen TATOLI/Abílio Elo Nini

DILI, 20 setembru 2024 (TATOLI) – Antigu Primeiru-Ministru, Mari Alkatiri no Arsénio Paixão Bano keixa atuál Prezidente Autoridade Rejiaun Administrativa Espesiál Oe-Cusse Ambeno (RAEOA) Rogeiro Tiago Lobato ba Ministériu Públiku, ohin.

Aprezentasaun keixa ne’e relativa ho deklarasaun Lobato nian katak Antigu Prezidente RAEOA uza poder hodi deside faan rai no rezidénsia Estadu ne’ebé lokaliza iha área Fulolo-Oe-Cusse ba Mari Alkatiri hodi sai hanesan propriedade privada.

“Ohin ami hato’o keixa foun ida tán ba iha Ministériu Públiku, keixa ne’e kona-ba Rogeiro Lobato ninia deklarasaun, ita bo’ot sira akompaña prosesu ne’e karik, momentu nia tama iha uma Fulolo ne’e. Saida mak nia deklara ne’e katak ami mak abuza poder”, Mari Alkatiri hateten ba jornalista sira hafoin ho Arsénio Bano hato’o keixa hasoru Rogerio Lobato iha Prokuradoria Jerál Repúblika, Colmera, sesta, ohin.

Nia dehan, keixa ne’e tuir lolos aprezenta ona maibé tanba Ministériu Públiku iha hela ferias judisiária, entaun iha sesta (20/9) ohin, mak foin hato’o keixa. Maibé tuir planu sei aprezenta tán keixa seluk.

“Keixa ida-ne’e laos ikus ona, sei mai nafatin, sei iha tán keixa ida tan, ne’e ba responsablidade kriminál no resposablidade morál, tanba ne’e di’ak liu nia taka nia ibun, lalika loke. Sé nia loke nafatin keixa sei tama nafatin”, nia afirma.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!