DILI, 23 setembru 2024 (TATOLI)–Vendedór merkadu Maneleuana, Joanico Tavares, husu ekipa jestaun merkadu iha Autoridade Munisipál Dili atu muda dala ida de’it negosiante ambulante sira faan sasán iha espasu públiku no dalan ninin, hodi labele hamate sira-nia negósiu iha merkadu ne’ebá.
“Mai soe hela ami iha ne’e no negosiante balun sai fali ba li’ur. Ida-ne’e halo deskriminasaun boot. Ami agora faan ho triste, tanba ami faan iha ne’e ema la sosa, untung laiha. Bee aqua kaixa ida faan to’o semana ida mós la hotu. Hanesan mós, Pop Mie baibain ami faan ne’e, ema la sosa no ami han hotu osan inan,” nia hateten ba jornalista sira iha Merkadu Manleuana, segunda ne’e.
Negosiante ne’e sujere ba Governu atu konsisten ho sira-nia kapasidade halo jestaun ba iha merkadu sira, tanba balun mai hela faan no balun halai sai fali ba faan iha li’ur ka espasu públiku sira ne’e.
“Sira tenke kontrola, hakarak mai ne’e mai duni, labele ami mai duni, balun metin no balun haksoit sai fali ba, ida-ne’e halo mate balun no balun buka moris. Ida-ne’e mak ami sente la di’ak. Se terus karik, ami terus hamutuk no di’ak karik ami di’ak hanesan,” nia dehan.
Tanba, vendedor sira barak mak kontinua faan iha espasu públiku hanesan Rotunda Comoro, antigu merkadu Comoro, Elemloi no fatin sira seluk ne’ebé ajuda impede kompradór sira ba sosa iha merkadu Manleuana.
Tuir nia, negosiante sira mai halo baraka kiik-oan sira iha ne’e husik mamuk no halai hotu ba faan iha li’ur, nune’e negosiante ne’ebé faan iha merkadu laran ne’e la hetan rendimentu.
“Ita faan ne’e, bainhira hamutuk iha fatin, ema ida hola ne’e sei buka ita. Agora balun faan iha dalan ninin no balun faan iha merkadu, entaun hili ida besik. Sé mak bulak mai to’o merkadu hodi buka produtu ida hanesan,” nia dehan.
Hatán ba iha preokupasaun ne’e, Xefe Departamentu Jestaun Merkadu iha Autoridade Munisipiu Dili, Joaquim Bragança Matos Belo, hateten vendedor sira-ne’ebé muda husi espasu públiku agora konsentra faan produtu iha merkadu Manleuana.
Tuir nia, bainhira mak sira sai husi ne’ebá sei hasai sira husi lista rejistu no sei esklui husi ne’ebá, atu labele fó oportunidade atu fila ba faan iha ne’ebá.
“Ami ekipa kontinua kontrola vendedór sira-ne’ebé faan iha merkadu Manleuana no Taibesi. Tanba sira tama ba iha merkadu Manleuana ne’e, ami halo koordenasaun ho jestór merkadu nian, entrega lista se sira sai, ami sei la tolera tama fali. Fatin ami entrega vendedór sira seluk,” Xefe Departamentu Jestaun Merkadu iha Autoridade Munisipiu Dili, Joaquin Bragança Matos Belo, ba Agência Tatoli, ohin.
Xefe departamentu ne’e hateten, sei muda tan vendedór sira-ne’ebé kontinua oukupa espasu públiku hodi faan sira-nia produtu ba iha merkadu boot sira hanesan iha Manleuana no Taibesi.
Jornalista : Jesuína Xavier
Editór : Cancio Ximenes
