DILI, 23 setembru 2024 (TATOLI)–Motorista husi munisípiu Ermera, João Alfredo, lamenta ho fatin estasionamentu iha Manleuana ne’ebé laiha kondisaun atu motorista sira husi munisipiu Ainaro, Aileu, Bobonaro, Covalima, Ermera, Liquiça no Manufahi, para sira-nia karreta iha fatin ne’e.
“Ami husu Governu atu hadi’a fatin ne’ebé justu ho kondisaun ne’ebé di’ak ba ami motorista sira husi munisípiu, nune’e ami bele para karreta iha fatin estasionamentu ne’e,” Motorista husi Ermera, João Alfredo hateten ba jornalista sira iha Merkadu Manleuana, segunda ne’e.
Aleinde ne’e, nia dehan, motorista sira husi munisipiu hitu ne’e uza hotu toilet públiku ida (1) de’it ne’ebé sei funsiona iha Merkadu Manleuana, maibé laiha bee-moos no laiha fasilidade eletrisidade ne’eb’e bele fasilita sira no fasilita vendedór sira hodi halo atividade faan no sosa nian.
“Sira lori ami mai hanesan sulan fahi mak ne’e. Toilet públiku araska tanba bee laiha. Ami para karreta iha rai-rahun laran, ami para mós pasajeiru laiha, entaun lorokraik ami sai mós sai ho mamuk de’it. Limita liu ba ami. Konta, munisipiu hitu ne’e, ida-ne’e mak sira lori mai sulan iha terminál Manleuana ne’e,” nia dehan.
Tanba ne’e, nia rekomenda ba Governu no Prezidente Repúblika foti desizaun urjente ida, atu bele muda fila-fali sira ba terminál uluk iha Tasi-Tolu, tanba agora ne’e sira lori pasajeiru sira diretamente ba iha terminál Manleuana.
“Bele loke fali terminál ida iha Tasi-Tolu, atu ami munisipiu tolu bele ba para ami-nia iha ne’ebá. Ami lori karreta diretamente no pasajeiru sira mai iha ne’e, para iha dalan no iha Tasi-Tolu sira tilan ami ne’e selu multa $100 ba leten. Ema pasajeiru sira iha Tasi-Tolu tun iha ne’ebá mós sira duni ami. Entaun, ema-nia uma iha Tasi-Tolu ka Manleuana. Hakarak ka lakohi, ema sira hela iha Tasi-Tolu, ami tenke para iha Tasi-Tolu atu sira tun maibé sira duni no kaer ami hodi tilan,” nia hateten.
Iha preparasaun atu simu Papa Francisco, nia dehan, Governu fó sai avizu liuhusi anúnsiu públiku ida ba motorista sira no sira kumpre orden ne’e hodi tenke muda-sai motorista sira-ne’e no hamamuk fatin Tasi-Tolu.
“Iha momentu ne’ebá, sira fó surat ne’e ba to’o loron 12. Terminál Becora ema uza ho di’ak, hahú husi Indonézia nia tempu. Tanbasa, Tasi-Tolu munisipiu tolu labele uza iha ne’ebá. Iha ne’e, to’o iha lorokraik, ema ida rua de’it mak mai. Ami ba mak ba tula sira iha dalan-dalan hodi sai de’it ba munisipiu, dala ruma sei tama ba merkadu Manleuana,” nia dehan.
Xefe Departamentu Jestaun Merkadu iha Autoridae Munisipiu Dili, Joaquim Bragansa Matos Belo, hateten fatin terminál Manleuana iha toilet públiku ida (1) de’it maibé iha unidade haat kompostu unidade rua ba feto no unidade rua ba Mane.
Iha sorin seluk, funsionáriu diresaun Nasionál Transporte Terestre, Joanico da Silva, hateten iha transporte bus husi Ainaro, Bobonaro no Covalima no Manufahi, no mikrolete no anguna husi Aileu, Ermera no Liquiça inklui mós travel, maibé sira enfrenta difikuldade ba saneamentu no bee.
“Difikuldade ba ami ne’e, komunidade husi munisipiu mai hotu iha ne’e maibé laiha haris fatin no bee. Iha loron hirak ne’e ami sente ida-ne’e,” Funsionáriu diresaun Nasionál Transporte Terestre, Joanico da Silva, hateten.
Funsionáriu ne’e hateten, populasau sira lori sira-nia produtu husi munisipiu hodi tula mai no hatun iha terminál Manleuana no kontinua ba iha merkadu Taibesi.
Karreta mikrolet no bus ne’ebé transporte pasajeiru sira-ne’e hetan lisensa, maibé nia mos kontinua apelu ba motorista sira hodi tama iha terminál Manleuana.
“Se lae, polisia tranzitu kaer hodi selu $50 no $100. Se lakohi kolabora mak tenke hasai lisensa operasaun no xapa mátrikula,” nia hateten.
Tuir observasaun Tatoli nian, terminál Manleuana laiha kondisaun hodi responde ba iha nesesidade pasajeiru no motorista sira hanesan haris fatin iha, maibé lafunsiona tanba laiha bee hodi utiliza no rai rahun barak.
Jornalista : Jesuína Xavier
Editór : Cancio Ximenes
