NOVA IORKE, 23 setembru 2024 (TATOLI) – Primeiru-Ministru (PM), Kay Rala Xanana Gusmão, akompaña husi Ministra Planeamentu no Dezenvolvimentu Ekonomia, Seirra Leone, Kenyeh Barlay, ofisialmente inaugura edifísiu ka eskritóriu Organizasaun Internasionál g7+ iha Nova Iorke-Amérika.
Eskritóriu g7+ ne’e lokaliza ka besik-malu ho edifísiu Organizasaun Nasaun Unida (ONU), iha Nova Iorke ho objetivu prinsipál hodi reforsa koordenasaun no advokasia iha ONU.
Iha serémonia inaugurasaun ne’e, PM Xanana konsidera eskritóriu ne’e reprezenta pasu signifikativu ba grupu g7+ hodi servisu hanesan sentru ba promosaun prioridade sira nasaun membru g7+ iha nível mundiál.
Biban ne’e, Ministra Planeamentu no Dezenvolvimentu Ekonomia, Serra Leone, Kenyeh Barlay, sente kontente bele hamutuk ho líder Timor-Leste ne’ebé hanesan pessoa eminente g7+ nian hodi inaugura edifísiu permanente g7+ nian iha Nova Iorke.
“Ha’u kontente tebes ohin loron inaugura eskritóriu g7+ nian iha Nova Iorke tanba g7+ nu’udar organizasaun ne’ebé eziste durante tinan-15 nia laran. Kuaze tinan 15 halo ona progresu boot sira. Desde nia estabelesimentu inisiál, g7+ sai instrumentál ba pás ne’ebé tama ona iha nivél globál,” Ministra ne’e hateten ba Agência TATOLI bainhira inaugura edifísiu ne’e, ohin.
Ministra ne’e hatutan, sekretariadu g7+ nian ida iha ona Lisboa-Portugal no agora ida iha Nova Iorke.
“Ami sente katak iha nesesidade atu ami-nia prezensa iha Nova Iorke tanba iha ona edifisiu besik ONU ne’e hafasil liutan ami-nia servisu sira hanesan observadór iha ONU,” ministra ne’e afirma.
Iha fatin hanesan, Sekretáriu Jerál g7+, Helder da Costa reforsa tan katak, g7+ hetan onra no previlejiu tanba iha ona sekretariadu permanente iha Nova Iorke.
“Ita sente onradu no previlejiu tanba g7+ bele iha ona esifisiu permanente iha Nova Iorke, ne’ebé simbolikamente inaguradu ona husi Primeiru-Ministru Timor-Leste nian no Ministra Planeamentu no dezenvolvimentu ekonómiku Sierra Leone nian. Sira na’in rua nia prezensa marka pasu importante ida ba g7+ liuhusi suporta politika no morál,” Helder tenik.
Ho edifisiu ne’e, nia konsidera bele lori g7+ nia servisu iha Nova Iorke sai efikasia liuliu ho parseria ho misaun diplomátika ho Estadu Membru sira no observadór internasionál sira.
“Ida-ne’e kompleta ona misaun g7+ nian hodi expande ita nia prezensa la’ós de’it iha Dili maibé iha Lisboa ita iha sentru ida iha ne’ebá, agora iha tan Nova Iorke bele hala’o di’ak liutan atividade g7+ nian iha nivél globál no hamorin mós Timor-Leste nia naran, no nasaun 20 ne’ebé hamahan aan iha g7+ bele hala’o servisu di’ak liutan iha Nasaun Unida,” nia afirma.
Atuál Sekretáriu Jerál g7+ ne’e subliña, orgaizasaun se de’it atu hela iha Nova Iorke tenke hetan akreditadu, maibé g7+ hanesan organizasaun intergovernamentál konsekuénsia husi estatutu observadór permanente iha Nasaun Unida iha 2019 mak lori g7+ hetan ona fatin iha Nova Iorke.
“Ita servisu maka’as durante ne’e mak hodi estabelese ita nia edifisiu ida iha ne’e, nune’e ekipa ne’e bele halo servisu diplomasia, advokasia hodi hasa’e vizibilidade g7+ nian iha Nova Iorke, prosesu ne’e ami la’o tinan naruk identifika fatin ne’ebé apropriadu no fatin ne’e besik loos sede ONU nian, kuaze metru 100 husi edifisiu g7+ nian,” nia afirma.
Timor-Leste nu’udár país foun, orgullu lidera organizasaun g7+ ne’ebé halibur nasaun frázil no pos-konflitu hamutuk 20 husi Áfrika, Ázia, Médiu Oriente no Pasífiku.
g7+ servisu maka’as atu apoia no reprezenta país sira no mós halo atu mundu rona país hotu nia lian. g7+ daudaun ne’e iha estatutu hanesan observadór iha ONU, ne’ebé fó dalan bá nia atu aprezenta prespetiva koletiva ida kona-bá ajenda no servisu ONU nian. g7+ defende papél ida ne’ebé ativu liu iha Nasaun Unida hodi promove reziliénsia no estabilidade Estadu sira nian.
Misaun seluk estabelese grupu g7+ maka harii dame no harii Estadu (peacebuilding and statebuilding) iha Timor-Leste rasik hasoru dezafiu oin-oin, maibé Timor-Leste iha vontade hakarak fahe esperiénsia ba nasaun frájil sira bo’ot tebes.
Ho misaun hirak ne’e, IX Governu Konstitusionál define ona Timor-Leste nia polítika esterna ho prinsípiu ida-ne’ebé konsagra sentidu independénsia no soberania mak: “Ba Timor-Leste laiha aliadu ka inimigu, hotu-hotu sei hamutuk no amigu de’it” Ida ne’e sai hanesan (Timor) ita-nia Lema, ne’ebé sei orienta ita iha Relasaun Esterna, iha Konjuntura Internasionál ida ne’ebé daudaun ne’e defisil tebes.
Timor-Leste sauda ba País Rejiaun hotu-hotu, ne’ebé fó ona apoiu internasionál iha aspetu oioin, hodi reforsa relasaun di’ak ho Austrália, Indonézia, Nova Zelándia, Xina, Japaun, Koreia Súl, no país membru ASEAN sira seluk.
Timor-Leste mós hakarak sauda ka simu ho di’ak relasaun amizade no solidariedade País sira hanesan Portugál, Brazíl, no komunidade pais PALOP, Kuba, Reinu Unidu, Irlanda, no Estadu Unidu Amérika, nune’e mós ba Organizasaun Internasionál sira, liu-liu ONU no ninia Ajénsia, Banku Mundiál, Fundu Monetáriu Internasionál no Banku Aziátiku Dezenvolvimentu, no Governu hakarak reforsa lasu asisténsia téknika no profisionál, ne’ebé Timor presiza hodi kumpre IX Governu nia misaun bá povu no nasaun.
Partisipa iha serimónia inagurasaun ne’e Ministru Negósiu Estranjeiru no Kooperasaun, Bendito dos Santos Freitas, Reprezentante Permanente Timor-Leste ONU nian, Dionísio da Costa Babo Soares, Sekretáriu Jerál g7+, Helder da Costa no no delegadu ofisiál sira.
Jornalista: Hortencio Sanchez
Editór: Florencio Miranda Ximenes
