NOVA IORKE, 24 setembru 2024 – Sekretáriu Jerál Organizasaun Nasaun Unidas (SekJer ONU), António Guterres ofisialmente halo abertura ba Sessaun Assembleia Jerál Organizasaun Nasaun Unidas (ONU) ba dala-79, iha Nova Iorke hodi husu ba nasaun boot hotu iha mundu atu hapara funu.
Tema sesaun AGNU ba dala-79 maka “Labele husik ema ida iha kotuk, hamutuk iha asaun ba progresu dame, dezenvolvimentu sustentavel no dignidade umana ba jerasaun foun iha futuru”.
Iha abertura ne’e, António Guterres hato’o asuntu ne’e ba nasaun boot sira atu hapara funu tanba ohin loron, Estadu no Governu barak-liu iha mundu mak sente no konsidera-an iha liu direitu atu hetan kartaun “livre husi prizaun”.
Nasaun barak mak sente-an boot-liu hodi la konsidera to’o sama direitu internasionál no sira bele halo violasaun ba iha Konvensaun sira husi ONU. Sira bele taka matan ba Konvensaun Direitu Umanu internasionál ka desizaun sira husi Tribunál Internasionál nian. Sira bele ignora tiha direitu umanitária internasionál.
Enkuantu nasaun boot sira bele uza forsa husi halo atake ba nasaun seluk, harahun povu husi nasaun seluk ka bele mós ignora tiha bem estár ninia povu rasik.
“Ita bele haree ho matan rasik iha era impunidade akontese iha fatin-fatin – iha Médiu Oriente, iha Europa ninia klaran, iha fornu Áfrika nian no mós nasaun sira iha Áfrika laran. Funu iha Ucrâina kontinua espalla no seidauk hatudu sinál ruma atu para,” António Guterres hateten iha diskursu abertura.
António Guterres dehan, iha ámbitu ne’e povu baibain mak tenke assume konsekuénsia, bele haree vítima sira kontinua aumenta ho ema mate númeru sa’e ba beibeik inklui povu barak mak hela iha pobreza nia okos.
Líder mundiál ne’e konvida katak, tempu to’o ona atu moris iha dame nia laran, pás no justu tuir konvensaun ONU nian, direitu internasionál no mós rezolusaun ONU nian.
António Guterres konvida mós atu bele haree ba Gaza hanesan mehi aat ida ne’ebé kontinua laiha rohan no lori ameasa boot ba iha área sira ne’ebé besik.
“Bele haree mós bá iha Lebanon, tenke matan moris neon na’in tanba situasaun iha ne’ebá iha hela situasaun ida perigu tebes ne’ebé bele rahun. Povu Lebanon Povu Israél –no povu iha mundu tomak labele husik atu Lebanon sai hanesan Gaza daruak,” nia apela.
Sesaun Assembleia Jerál Nasaun Unidas ne’e, loke ofisialmente husi Sekretáriu-Jerál ONU, António Guterres no abertura ba debate jerál, Xefe Estadu no Xefe Governu husi Prezidente Repúblika Federativa Brazil, Luís Inácio Lula da Silva, nu’udár tradisaun dezde hahú primeira Sesaun Assembleia Jerál nian no tuir kedan ho Prezidente Repúblika Estadus Unidus Amérika, Joe Biden, hanesan uma-na’in hodi hato’o mensajen despedida iha ONU.
Iha debate jerál ne’ebé halibur Xefe Estadu no Xefe Governu sira-ne’e ho objetivu atu diskute no halo avaliasaun ba progressu no dezafiu sira husi implementasaun programa Objetivu Dezenvolvimentu Sustentável (ODS) Nasaun Unidas nian, ba finansiamentu dezenvolvimentu nasaun sira menus dezenvolvimentu, Estadu Illa kiik sira no seluk tán.
Amérika promete buka solusaun hapara konflitu globál
Biban ne’e, Prezidente Repúblika Estadu Unidu Amérika, Joe Biden iha mensajen ikus, promete sei buka solusaun ba konflitu globál sira hanesan funu Rúsia ho Ukrânia, Izraél no Palestina, no ba kestaun direitu umanu no respeita ba lei no orden internasionál sira liu-liu karta Nasaun Unidas nian.
Sessaun Assembleia Jerál ONU ba dala-79 iha tinan ne’e ho tema, “Unidade iha diversidade bá avansu páz, dezenvolvimentu sustentável no dignidade ema nian, bá ema hotu iha ne’ebé de’it” no sessaun ne’e prezide hosi Embaixadór Philemon Yang hosi Cameroon.
Iha oportunidade ne’e, Primeiru-Ministru, Kay Rala Xanana Gusmão no Ministru Negósiu Estranjeiru no Kooperasaun, Bendito dos Santos Freitas, no Reprezentante Permanente Timor-Leste ONU nian, Dionísio da Costa Babo Soares marka prezensa hodi rona mós palestra husi lider mundiál sira.
Tuir ajenda, iha loron 27 Setembru, Primeiru-Ministru, Xanana Gusmão sei hato’o palestra ofisiál kona-bá situasaun Timor-Leste nian liga ho servisu ONU nian.
Assembleia Jerál ONU hanesan órgaun importante ida hosi órgaun neen ne’ebé kompoin ONU no halibur Estadu membru sira hamutuk 193, bolu atensaun makas bá nasaun boot sira atu hapara funu hodi lori dezenvolvimentu bá nasaun no povu nia moris di’ak.
Jornalista: Hortencio Sanchez
Editór: Florencio Miranda Ximenes
