PM orienta Kónsul Jerál identifika situasaun reál hodi fó asisténsia ba timoroan iha Belfast
DILI, 01 outubru 2024 (TATOLI)–Primeiru-Ministru, Kay Rala Xanana Gusmão, tersa ne’e, konvoka enkontru ho Kónsul Jerál Timor-Leste dezignadu ba Belfast-Irlanda Norte, Abreu Ximenes Coreia, hodi hato’o despedida molok dezloka bá halo misaun diplomátika.
Biban ne’e, Xefe Governu orienta Kónsul Jerál atu reprezenta didi’ak Estadu no buka hatene situasaun reál hodi fó asisténsia ba timoroan sira.
“Ha’u mai hasoru Primeiru-Ministru Hodi simu orientasaun ruma. Primeiru-Ministru orienta atu hala’o serbisu nu’udar Reprezentante Estadu no fó asinténsia ba sidadaun sira iha Belfast. Buka hatene sira-nia situasaun no sira-nia serbisu,” Abreu Ximenes hateten iha Palásiu Governu, tersa ne’e.
Notísia relevante : MNEK husu adisionál millaun $5 estabelese Embaixada rua no Konsuladu ida
Kónsul Jerál ne’e planeia atu hasoru malu ho timoroan sira iha Belfast no sei kontaktu regularmente ho Embaixadór Timor-Leste iha Reinu Unidu, João Paulo, hodi organiza enkontru atu buka hatene situasaun reál bazeia ba orientasaun Xefe Governu.
PM mós hameno ba Kónsul Jerál atu enkoraja timoroan sira serbisu didi’ak tuir mensajen Papa Francisco bainhira hala’o vizita mai Timor iha fulan kotuk.
Jornalista : Osória Marques
Editora : Julia Chatarina
