BAUCAU, 04 outubru 2024 (TATOLI) – Komisaun Organizadora Munisipál Baucau hato’o ona relatóriu ezekusaun orsamentu kona-ba vizita Papa Francisco ba nasionál.
Komisaun organizadora liuhusi Responsável Seksaun Administrasaun no Finansa atual Sekretáriu Munisipál Baucau Asuntu Administrasaun no Finansas, Juvinal Daniel Filipe Belo, esplika, relatóriu referida relata iha loron-02 outubru hafoin komisaun lokál iha munisípiu Baucau remata halo despedida no totál orsamentu ne’ebé antes ne’e utiliza hamutuk valor rihun $40.
“Repatóriu hotu-hotu submete ona ba nasionál no agora nasionál halo hela verifikasaun depois loron-10 tuir orientasaun husi Ministériu,” Responsável Seksaun Administrasaun no Finansa Komisaun Organizadora Baucau hateten iha Vila Nova, sesta ne’e.
Husi totál orsamentu ne’ebé iha, aloka ba transporte hamutuk rihun $334 no kombustível hamutuk $ 35.780 hodi tula peregrinu sira husi Postu Administrativu sira kompostu husi karreta kamioneta, bís no seluk tan hodi tula peregrinu sira ba Dili.
“US$ 35 mil ne’e ba transporte, entaun peregrinu sira la’o, ne’e ita mos prepara,” Juvinal Belo akresenta.
Alende ne’e, lojístika hodi prepara arku iha Dili hamutuk $850, kompras bee hemu hamutuk $1.471.00 ne’ebé distribui ba kada postu no rihun $1 utiliza ba karreta 5 tula tenda hamutuk 37 hodi peregrinu sira hela iha akampamentu.
Komisaun lokál Baucau mos aloka tan orsamentu $ 410 ba ekipa moradores hamutuk nain-100 hanesan alimentasaun nian durante halo preparasaun.
Jornalista : Natalino Belo
Editór : Evaristo Soares Martins
