Cancio Xavier rekoñese rekursu umanu sai dezafiu ba Defensoria Públika

DILI, 07 outubru 2024 (TATOLI) – Defensór Públiku Jerál, Cancio Xavier, rekoñese rekursu umanu durante tinan 20-resin ona maibé nafatin sai dezafiu bo’ot ba Defensoria Públika tanba atualmente Timor-Leste iha de’it 34.
“Kona-ba rekursu ita rekoñese katak iha difikuldade até 24 anos tanba ezisténsia Defensoria Públika bainhira ONU halo misaun, ami iha 1 janeiru 2000, Defensór Públika hahú halo nia papél. Iha 24 anos ezisténsia Defensoria Públika ita seidauk hetan númeru naton”, Cancio Xavier hateten ba jornalista sira iha nia kna’ar fatin Masquerinhas, Segunda, ohin.
Cancio dehan, kandidatu sétimu kursu ba defensoria públika iha ema na’in-haat atu mai reforsa maibé seidauk hola funsaun tanba lei.
“Foin daudaun husi kandidatu sétimu kursu ba Defensoria Públika iha ema na’in haat mak atu mai reforsa servisu Defensoria Públika nian, maibé sira seidauk toma funsaun ida tanba iha lei, foin sira presiza kompleta tán kursu tinan ida iha Portugal tanba ne’e mak agora ami-nia rekursu mantein hela ema na’in 34”, nia adianta.
Nia dehan, dezafiu ida tán ba Defensoria Públika mak ema ladún koñese servisu Defesór Públiku nian.
“Defensoria Públika iha dezafiu barak mezmu todan maibé ami kontinua asume responsavél ida-ne’e atu fó asisténsia ba povu bazeia ba artigu 26 husi Konstituisaun RDTL ne’ebé hateten labele nega justisa ba ema por razaun sira-nia sosiál”, nia informa.
Nia dehan, Defensoria Públika kontinua fó asisténsia justisa ba ema kbi’it laek tanba servisu Defensór Públika nia kna’ar mak fó asisténsia ba ema ne’ebé nesesitadu duni.
“Ami nafatin esforsu atu buka hodi introdús servisu Defensoria Públika nia oinsá ita-nia sidadaun bele asesu justisa ho di’ak no maske hasoru dezafiu maibé ami mantein halo servisu tuir kna’ar defensória nia hodi fó assisténsia legál ba ita-nia sidadaun sira”, nia dehan.
Defensór husu ba Governu atu kria lei orden advoagdu atu bele define lolos servisu advogadu no defensór nian katak sé mak hakarak mai Defensór Públiku entaun bele mai hodi reforsa kuadru legál no sé mak ba advogadu entaun bele konkore ba iha ne’ebá.
“Ho lei orden dos advogados ne’e define kuandru legál sira ne’ebé atu reforsa iha setór justisa, maibé to’o agora ita seidauk iha lei orden dos advogados”, nia konklui.
Jornalista: Natalino Costa
Editór : Zezito Silva

