Top

Tinan oin harii edifísiu defensoria públika iha Munisípiu Viqueque

Defensor Públiku Jerál, Câncio Xavier. Imajen Tatoli/Dok

DILI, 07 outubru 2024 (TATOLI) – Defensór Públiku Jerál, Cancio Xavier, hateten Defensoria Públika planeia katak tinan oin, instala edifísiu ida tán iha Munisípiu Viqueque atu lori justisa besik liu ba povu.

“Iha planu asaun anuál ba tinan oin sei konstrui sede delegasaun Defensoria Públika iha Munisípiu Viqueque. Konstrusaun ba obra ida-ne’e iha ona Bill of Quantity (BoQ). Agora daudaun tékniku husi Ministériu Obras Públika haree hela asuntu ne’e, kuandu los ona, lori mai ami asina no tinan oin ita implementa”, Cancio Xavier hateten ba jornalista sira iha nia kna’ar fatin Masquerinhas, Segunda, ohin.

Nia dehan, tuir dezeñu no BoQ ne’ebé iha katak konstrusaun edifísiu Defensoria Públika iha Viqueque ne’e kompleta mós ho rezidénsia ba Defensór Públiku sira.

“Orsamentu Defensoria Públika ba tinan oin, ami hamutuk ho Ministériu Justisa, ha’u ladún lembra nia montante, maibé kona-ba konstrusaun ba edifísiu Defensoria Públika iha Viqueque ne’e ita prevé por volta osan $500.000-resin ne’ebé ita tau iha orsamentu grande projetu. Tékniku sira husi Ministériu Obras Públika verifika obra ne’e, posibilidade orsamentu ba obra ne’e sei aumenta depende ba tékniku sira-nia verifikasaun”, nia adianta.

Nia subliña, Viquequ iha ona Ministériu Públiku, tuir planu, sei instala Tribunál Judisiál Primeira Instánsia, atu halo kompletu liután ho objetivu atu lori besik justisa ba povu.

“Agora daudaun ita iha ona edifísiu Ministériu Públiku ida iha Viquque no aban bainrua tuir planu ne’ebé  mak iha katak ita sei  instala tán Tribunál Judisiál Pimeiru  Instánsia ida iha Viqueque no ita instala tán edifísiu Defensoria Públika ida iha tán Viqueque, entaun ita kompleta ona servisu justisa iha munisípiu ho ida-ne’e, ita bele lori besik justisa ba povu”, nia informa.

Tuir defensór katak konstrusaun ba edifísiu Defensoria Públika laos halo iha Viqueque de’it maibé sei instala hotu iha munisípiu sira seluk hanesan Lautém, Ermera, Bobonaro no Manufahi.

“Depoizde konstrusaun edifísiu Defensoria Públika no rezidénsia ba Defensór Públika sira iha Viquque, ami sei kontinua konstrui mós edifísiu ba Defensoria Públika ba munisípiu sira seluk hanesan Lautém, Ermera, Bobonaro no Manufahi, rai ba konstrusaun sira ne’e ami iha hotu ona”, nia haktuir.

Nia dehan, konstrusaun Defensoria Públika no rezidensia ba Defensór Públika presiza halo tanba ne’e importante.

“Ita iha ona lei organizasaun judisiária no lei ida-ne’e fó biban ba ita atu instala Tribunál Judisiál Primeira Instánsia iha munisípiu sira no ba oin presiza instala edifísiu ba Defensór Públika iha munisípiu atu ita lori justisa besik liu ba povu”. nia konklui.

Jornalista: Natalino Costa

Editór : Zezito Silva

Publisidade

Leave a Reply

Latest Post

error: Content is protected !!