DILI, 09 outubru 2024 (TATOLI) – Governu liu hosi reuniaun Konsellu Ministru kuarta ne’e iha Palásiu Governu Dili diskute no delibera hodi fó podér tomak ba Ministru Planeamentu no Investimentu Estratéjiku (MPIE), Gastão Francisco de Sousa, hodi asina memorandu entendimentu ida ho Governu Repúblika Indonézia, iha ámbitu kooperasaun ba dezenvolvimentu.
“Reuniaun ne’e fó podér tomak ba MPIE atu hasoru malu ho nia omólogu iha Indonézia hodi asina akordu balun kona-ba dezenvolvimentu hanesan, infrastrutura nian iha Timor-Leste. Autorizasaun ohin, aban Ministru ba ona Indonézia atu asina akordu ne’e,” Vise Ministru Asuntu Parlamentár Adérito Hugo da Costa hateten.
Akordu ne’e sei asina iha loron 11 fulan-outubru, durante vizita ofisiál Ministru Gastão Francisco de Sousa bá Jakarta Indonézia.
Memorandu entendimentu ida ne’e kobre área kooperasaun dezenvolvimentu oioin, inklui harii infraestrutura bázika, promove enerjia renovável ne’ebé asesivel, kria sidade no komunidade sustentável, promove agrikultura no dezenvolvimentu rurál, dezenvolve turizmu, hadi’a setór saúde no edukasaun, enkoraja investimentu setór privadu, promove dezenvolvimentu dijitál, inkluzaun sosiál, no esforsu mitigasaun ba mudansa klimátika.
Jornalista: Hortencio Sanchez
Editór: Florencio Miranda Ximenes
