Notariadu utiliza ona mákina foun ba Imprensaun Pasaporte

DILI, 09 outubru 2024 (TATOLI) – Diretór Jerál Servisu Rejistu Notariadu (DGSRN), Agostinho Gonçalves Vieira, hateten mákina foun rua ba Prodúsaun Pasaporte, ekipa tékniku husi Thales hamutuk ekipa tékniku husi Servisu Rejistu Notariadu monta ona, agora bele utiliza ba imprensaun pasaporte.
“Sim, mákina foun rua ba Prodúsaun Pasaporte ne’ebé foin daudaun ita hola iha Finlándia, ekipa tékniku husi Thales hamutuk ita-nia ekipa tékniku husi Servisu Rejistu Notariadu konklui ona ninia instalasaun. Ha’u bele dehan iha fulan-Setembru, ita hahú utliza ona to’o ohin loron”, Agostinho Gonçalves, dehan ba jornalista TATOLI iha nia kna’ar fatin Mandarin, kuarta, ohin.
Nia salienta, Prodúsaun Pasaporte uluk hetan difikuldade, tanba kondisaun mákina mak la permite.
“Ita uluk iha mákina prodúsaun ba pasaporte rua, maibé ida avaria hela ida mak funsiona, maibé prodús pasaporte kontinua lao. Tanba ne’e mak ita-nia Governu deside hola tán mákina rua no agora ita uza ona. Ha’u bele dehan loron ida mákina rua ne’e bele prodús pasaporte 400 bele to’o 500”, nia adianta.
Agostinho garante katak ho mákina foun rua ne’e bele rezolve atendimentu pasaporte iha Notariadu.
“Ita bo’ot sira haree ho mákina rua ne’e ita bele aselera atendimentu ba pasaporte iha ne’e. Ita bo’ot sira haree hafoin mákina rua ne’e ita utiliza iha fim setembru nia laran, nune’e iha inísiu outubru, ema ladún antrian ona iha ne’e”, nia konklui.
Jornalista: Natalino Costa
Editór : Zezito Silva

