PR Horta husu Universidade Nova Gales Súl apoia estudante timoroan
DILI, 09 outubru 2024 (TATOLI) – Prezidente Repúblika, José Ramos-Horta hasoru malu ho ofisiál aas sira hosi Universidade Nova Gales do Sul (UNSW) iha Sydney Austrália foin lalais ne’e hodi ko’alia no Xefe Estadu hato’o pedidu ida ba Universidade ne’e atu apoiu estudante timoroan sira bainhira ba eskola iha ne’ebá no iha Timor-Leste.
“Prezidente Repúblika hato’o ninia pedidu ba UNSW atu kontinua fó apoiu ba estudante Timoroan sira, partikularmente oinsá hasa’e sira-nia kapasidade iha enjeñaria, saúde, no agrikultura,” tenik iha nota ne’ebé Agência TATOLI asesu husi media Gabinete Prezidente Repúblika, ohin.
Xefe Estadu nia vizita ba UNSW habelar liu diskusaun administrativu sira no Prezidente Ramos-Horta envolve iha diálogu ida ho estudante sira direitu no justisa nian, hodi aborda tópiku sira hanesan jeopolítika no direitus umanus iha Ázia no kontestu globál ne’ebé luan liu.
Interasaun ida-ne’e fornese ba estudante sira oportunidade úniku ida atu hetan hanoin sira hosi líder mundiál ida ho esperiénsia kle’an iha área sira-ne’e.
Prezidente Ramos-Horta mós hasoru malu ho autoridade sira UNSW nian ne’ebé envolve iha projetu konservasaun ne’ebé foka liu ba bee no agrikultura iha Timor-Leste.
Horta subliña, importánsia atu kontinua inisiativa sira ne’e no garante katak apoiu to’o diretamente iha baze.
Abordajen ida-ne e aliña ho Timor-Leste nia esforsu sira ne’ebé la’o daudaun atu dezenvolve prátika sustentável sira iha setór krusiál sira-ne e.
Espresa gratidaun ba UNSW nia apoiu kontinua, Prezidente Ramos-Horta rekoñese universidade nia knaar hodi fornese oportunidade edukasionál ba estudante simoroan sira iha sira nia kampus Sydney.
Parseria ida-ne’e entre Timor-Leste no UNSW reprezenta pasu signifikativu ida iha nasaun nia buka atu hasa’e kapasidade no dezenvolvimentu rekursu umanu, ne’ebé importante tebes ba nasaun nia kreximentu no estabilidade ba tempu naruk.
Jornalista: Hortencio Sanchez
Editór: Florencio Miranda Ximenes
