Konsellu Superiór Polísia demite membru PNTL na’in-tolu

DILI, 11 outubro 2024 (TATOLI)- Inspetór Jerál Polísia Nasionál Timor-Leste (PNTL, Superintendente Xefe Polísia, Jorge Monteiro, dehan reuniaun Konsellu Superiór Polísia (KSP) deside demite membru PNTL na’in-tolu tanba suspeita komete ba kazu infrasaun disiplinar.
“Ohin reuniaun Konsellu Superiór Polísia ita halo diskusaun ba demisaun membru PNTL hamutuk na’in-tolu. Membru PNTL sira-ne’e envolve iha kazu disiplinar iha Likisá”, Superintendente Xefe Polísia Jorge Monteiro hateten ba jornalista sira Komandu Jerál Cacoli, sesta ne’e.
Jorge dehan, desizaun Konsellu Superiór Polísia ne’e sei enkamiña ba Ministru Interiór nudar alta entidade mak sei foti desizaun.
“Kuandu Konsellu Superiór Polísia deside demite ona membru PNTL ne’e husi instituisaun PNTL, ita sei halo akta rezultadu reuniaun Konsellu Superiór ninia, ita submete ba sua eselénsia Ministru Interiór hanesan entidade mais altu ne’ebé ke bele determina ema ne’e bele demite ou lae”, nia adianta.
Komandante Jorge ne’e, hateten dala ruma Konsellu Superiór deside halo demisaun ba membru PNTL maibé kuandu submete ba Ministru Interiór mak Ministru Interiór haree iha fundamentu seluk iha mós evidénsia seluk no razaun seluk, entaun desizaun ne’e bele oin seluk.
Iha biban ne’e mós, Ofisiál PNTL ne’e fundamenta katak reuniaun Konsellu Superiór iha parte dadersan koalia kona-ba avaliasaun servisu membru PNTL sira-nia inklui diskute mós kona-ba membru PNTL ne’ebé servisu hodi ba servisu iha instituisaun Estadu seluk inklui ba ona servisu iha rai liur.
“Iha membru PNTL balun ne’ebé oras ne’e daudaun sira-nia servisu hodi ba servisu iha instituisaun Estadu seluk inklui ba ona servisu iha rai li’ur. Tanba ne’e atu halo desizaun ba sira presiza liuhusi Konsellu Superiór Polísia para bele foti desizaun ba sira”, nia afirma.
Komandante ne’e lakohi fó sai membru PNTL hira mak abandona sira-nia servisu hodi halo fali servisu iha fatin seluk, tanba desizaun ba sira ne’e seidauk iha iha hela prosesu diskusaun iha Konsellu Superiór Polísia.
Jornalista: Natalino Costa
Editór : Zezito Silva

